ខេត្តកែប៖ ព្រៃលិចទឹកមួយកន្លែងនៅភូមិអំពែង ឃុំអង្កោល ស្រុកដំណាក់ចង្អើរ ខេត្តកែបកំពុងតែរងការរំលោភធ្វើជាកម្មសិទ្ធិហើយអាជ្ញាធរធ្វើមិនដឹងបើយោងតាមសេចក្តីរាយការណ៍មួយបានឲ្យដឹងថាព្រៃលិចទឹកដែលគេកំពុងតែរំលោភយកធ្វើជាកម្មសិទ្ធិនោះមានប្រមាណជាង ៥០ ហិចតាហើយសព្វថ្ងៃនេះកំពុងតែមានអ្នកមានលុយនិងមានអំណាចមួយចំនួនកំពុងតែជួលប្រជាពលរដ្ឋកាប់និងជីកលើកភ្លឺធ្វើព្រំប្រទល់។ លោក
មេឃុំអង្កោល លោក ម៉ី ជី បានប្រាប់អ្នកយកព័ត៌មានយើងថាលោកមិនបានដឹងរឿងនេះទេ ហើយអភិបាលស្រុកដំណាក់ចង្អើរលោកស្រី ព្រំ ចន្នី បានប្រាប់អ្នកយកព័ត៌មានក្នុងស្រុកថាលោកស្រីពុំដឹងរឿងនោះទេចាំខ្ញុំឱ្យខាងភូមិឃុំចុះទៅមើលចំណែក ឯកឧត្តម កែន សត្ថា អភិបាលខេត្តកែប បានប្រាប់អ្នកយកព័ត៌មានយើងថា លោកនឹងបញ្ជាឱ្យខាងមន្ត្រីជំនាញចុះទៅពិនិត្យមើលជាបន្ទាន់អំពីបញ្ហានេះព្រោះព្រៃលិចទឹកជាដីរដ្ឋមិនអាចឲ្យនរណារំលោភយកបានទេ។
ទោះបីយ៉ាងណាក៏ដោយប្រជាពលរដ្ឋនៅភូមិអំពែងមួយចំនួនកំពុងតែនាំគ្នានិយាយរិះគន់អាជ្ញាធរភូមិឃុំស្រុកថាបើអាជ្ញាធរភូមិឃុំនិងស្រុកមិនបើកភ្លើងខៀវឲ្យនោះទេពួកជនខិលខូចក៏មិនអាចជួលប្រជាពលរដ្ឋមកកាប់ឆ្ការព្រៃលិចទឹកនេះបានឡើយ។
ប្រជាពលរដ្ឋបាននាំគ្នាលើកឡើងថាក្នុងរយៈពេលប៉ុន្មានខែនេះខេត្តកែបជា ខេត្តមួយកំពុងតែមានសន្ទុះដីធ្លីឡើងថ្លៃយ៉ាងគំហុកបានជាអាជ្ញាធរមួយចំនួននិងជនខិលខូចគប់គិតគ្នាជួលប្រជាពលរដ្ឋមកកាប់ឆ្កាព្រៃលិចទឹកដើម្បីយកទៅលក់ឲ្យក្រុមឈ្មួញធំៗធ្វើមានធ្វើបានរាងរៀងខ្លួន៕
