ខេត្តព្រៃវែង ៖យុវជនបែកថ្នាំម្នាក់ ឡើងចាប់រំលោភកូនក្រមុំអ្នកភូមិចំនួនពីរផ្ទះតែមិនបានសម្រេច កាលវេលាម៉ោង ១២និង៣០ ថ្ងៃត្រង់ ត្រូវនឹងថ្ងៃទី២៩ ខែកក្តដា ឆ្នាំ២០១៩ នៅក្នុងភូមិចង្រុះ ឃុំរំចេក ស្រុកព្រះស្តេច ខេត្តព្រៃវែង។
នារីរងគ្រោះអាយុ១៧ឆ្នាំ រស់នៅជាមួយ ឪពុកឈ្មោះ ឃុន សំអូន អាយុ៤១ឆ្នាំ មុខរបរ កសិករ និងម្តាយឈ្មោះ អៀវ សុធឿន អាយុ៤១ឆ្នាំ មុខរបរ កសិករ នៅភូមិចង្រុះ ឃុំចេក ស្រុកព្រះស្តេច ខេត្តព្រៃវែង។
រីឯកូនអ្នកម្នាក់ទៀត ដឹងថាជនម្នាក់បម្រុងឡើងលើផ្ទះនាងបានស្រែឲ្យអ្នកភូមិជួយ ពេលនោះជនសង្ស័យបានរត់គេចចខ្លួនបាត់។
ដែលអ្នកភូមិស្គាល់ថាឈ្មោះ ជាតិ អាយុ២៥ឆ្នាំ ការងារមិនពិតប្រាកដ បានបាត់រត់គេចខ្លួនស្រមោលដែលមានឪពុកឈ្មោះ ហាក់ ម្តាយឈ្មោះ លាភ រស់នៅភូមិចង្រុះ ឃុំចេក ស្រុកព្រះស្តេច ខេត្តព្រៃវែង។
យោងតាមសម្តីពីឪពុកម្តាយនារីរងគ្រោះបានប្រាប់ថា កាលពីវេលាកើតហេតុខាងលើ ក្រោយបានហូបបាយថ្ងៃត្រង់រួច ប្តីប្រពន្ធពួកគាត់ទាំងពីរ បានចុះទៅ មើលស្រែចំការដូចធម្មតា។ ចំណែកកូនស្រីរបស់គាត់ដែលជាជនរងគ្រោះ មិនបានទៅណាទេ នាងមើលទូរទស្សន៍ម្នាក់ឯងនៅលើផ្ទះបន្ទាប់មក ជនបង្កបានមកដល់ ហើយក៏ស្រែកសួរពីក្រោមផ្ទះថា “ពូមីងនៅផ្ទះឬអត់ គាត់ទៅណាហើយ!”។
ប្រភពដដែលបានបន្តថា នារីរងគ្រោះបានឆ្លើយទៅវិញថា “រកអីដែរ ពួកគាត់មិននៅទេ” បន្ទាប់មកស្រាប់តែ ជនបង្កបានហក់ឡើងលើផ្ទះ ឃើញនាងនៅម្នាក់ឯង ក៏ស្ទុះចូលទៅចាប់ច្របាច់កររំលោភតែសំណាងល្អ នារីរងគ្រោះបានប្រតាយប្រតប់រើសបម្រាស់រួចខ្លួន រត់ចុះដីសំដៅទៅផ្ទះបងប្អូនជិតខាងស្រែកឲ្យគេជួយទាំងយំភិតភ័យញ័រខ្លួន ចំណែកជនបង្កក៏បានរត់គេចខ្លួនបាត់ស្រមោលផងដែរ។
បន្ទាប់មកឪពុកម្តាយនារីរងគ្រោះ បាននាំគ្នាទៅប្តឹងនៅប៉ូលីសប៉ុស្តិ៍រំចេក ហើយមន្ត្រីប៉ូលីសបានចុះមកស៊ើបសួរធ្វើកំណត់ហេតុ ដើម្បីតាមចាប់ជនបង្ក៕ដោយម៉េង ហួត
