ភ្នំពេញ ៖ ជនជាតិចិន២នាក់ ម្នាក់ជាអ្នករួមដំណើរ និងម្នាក់ទៀតជាអ្នកបើករថយន្តស្តារិច (Starex HVX) មួយគ្រឿង ធ្វើចរាចរណ៍លើដងផ្លូវ ដោយយកប្លាស្ទិចបិតរុំស្កុតពីលើស្លាកលេខជិតទាំងមុខទាំងក្រោយ មិនដឹងថា មានបំណងអ្វី ឬពាក់ព័ន្ធនឹងបទល្មើសអ្វី ក៏មិនទាន់ដឹងនៅឡើយ តែត្រូវបានកម្លាំងល្បាតរបស់អធិការដ្ឋាននគរបាលពោធិ៍សែនជ័យ បានជួបតាមផ្លូវ ដោយសង្ស័យក៏ឃាត់នាំទាំងរថយន្ត ទាំងជនជាតិចិន២នាក់ យកទៅសាកសួរ។
ហេតុការណ៍នេះ បានកើតឡើងកាលពីវេលាម៉ោង៨និ៥០នាទីយប់ ថ្ងៃទី២ ខែសីហ ឆ្នាំ២០១៩ នៅលើផ្លូវសហព័ន្ធរុស្ស៊ី (ភ្លើងស្តុប) មុខព្រលានយន្តហោះ ភូមិក្បាលរំរី២ សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបានឲ្យដឹងថា រថយន្តដែលសមត្ថកិច្ចឃាត់ខាងលើ ម៉ាកស្តារិច HVX ពណ៌ទឹកប្រាក់ បិទស្លាកលេខជិតទាំងមុខទាំងក្រោយ មិនដឹងថា មានមូលហេតុអ្វី ឬជាប់ពាក់ព័ន្ធនឹងបទល្មើសអ្វីដែរ ហើយអ្នកបើកបរ និងរួមដំណើរសុទ្ធតែជាបុរសជនជាតិចិន មានវ័យជាង២០ឆ្នាំ បើកបរលើដងផ្លូវសហព័ន្ធរុស្ស៊ី ពីលិចទៅកើត ស្របពេលដែលកម្លាំងល្បាតរបស់អធិការដ្ឋានខណ្ឌពោធិ៍សែនជ័យ ប្រទះឃើញ ដោយមានការសង្ស័យ ក៏បោះដៃតាមវិទ្យុទាក់ទង(ID) ចេញអន្តរាគមន៍ស្ទាក់ឃាត់បាន ដោយស្លាកលេខមិនប្រក្រតី រួចនាំទាំងជនជាតិចិន២នាក់ ទៅសាកសួរនៅផ្នែកជំនាញ៕
