ភ្នំពេញ៖ កម្លាំងសមត្ថកិច្ចប៉ុស្តិ៍រដ្ឋបាលភ្នំពេញថ្មី ដេញចាប់ក្របួចបានលោកចោរដៃស្អិត២នាក់ភ្លាមៗ បន្ទាប់ពីធ្វើសកម្មភាពឆក់យកកាបូបយួរ ពីជនរងគ្រោះ ដែលទើបចេញពីផ្សារ AEON 2 នៅចំណុចតាមផ្លូវ១០១៥ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ។
ជនសង្ស័យ២នាក់ រួមមានទី១ឈ្មោះ ចៀន ដេវីត ភេទប្រុស អាយុ១៦ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះលេខ១៧៩D ផ្លូវលំ ភូមិមិត្តភាព សង្កាត់គីឡូម៉ែត្រលេខ៦ ខណ្ឌឬស្សីកែវ (មានសារធាតុញៀន) និងទី២ឈ្មោះ វុត្ថា សុខធារិទ្ធ ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះលេខ១២៥ ផ្លូវលំ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឬស្សីកែវ (មានសារធាតុញៀន) ។ ចំណែកជនរងគ្រោះឈ្មោះ ផាន់ វណ្ណៈ ភេទស្រី អាយុ៥៤ឆ្នាំ ជនជាតិខ្មែរ មុខរបរធ្វើស្រែ ស្នាក់នៅ ភូមិ៣ ឃុំព្រែកអាជី ស្រុកក្រូចឆ្មារ ខេត្តកំពង់ចាម។
សម្ភារៈបន្សល់ទុក កាបូបយួដៃចំនួនមួយគ្មានប្រាក់ ប្រគល់ឲ្យជនរងគ្រោះវិញ និងម៉ូតូ១គ្រឿង ម៉ាកហុងដា សេ១២៥ ផលិតឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ 1CX-0065 របស់ជនសង្ស័យ ជិះធ្វើសកម្មភាព។
ប្រភពព័ត៍មាន បានឲ្យដឹងថា មុនពេលកើតហេតុ ជនរងគ្រោះបានជិះម៉ូតូកង់បីចេញពីផ្សារ AEON ២ លុះមកដល់ចំណុចកើតហេតុខាងលើ ស្រាប់តែមានជនសង្ស័យ២នាក់ ជិះម៉ូតូ១គ្រឿងមកជិតម៉ូតូម៉ូតូកង់បី រួចធ្វើសកម្មភាពឆក់យកកាបូបពីជនរងគ្រោះ តែបណ្តាលឲ្យដួលម៉ូតូ រួចជនសង្ស័យបាននាំគ្នារត់គេចខ្លួន តែត្រូវជនរងគ្រោះស្រែកថាចោរៗ បន្ទាប់មកសមត្ថកិច្ច បានធ្វើការល្បាតដល់ចំណុចកើតហេតុ ឃើញហេតុការណ៍ បានធ្វើការដេញតាមចាប់ជនសង្ស័យបាន យកមកធ្វើការសាសួរ នៅអធិការដ្ឋាននគរបាលខណ្ឌសែនសុខ ហើយជនរងគ្រោះបានដាក់ពាក្យបណ្តឹង ចោទប្រកាន់ជនសង្ស័យតែម្តង.
បច្ចុប្បន្ន ជនសង្ស័យកំពុងឃាត់ខ្លួន នៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនិតិវិធី៕
