ភ្នំពេញ៖បុរសម្នាក់ត្រូវជនមិនស្គាល់មុខមួយក្រុម ដែរធ្វេីសកម្មភាព ជិះម៉ូតូដេញវាយគ្នាបែកក្បាលហូរឈាមរហូតដល់ដេកស្លាប់ផ្កាប់មុខយ៉ាងអាណោចអាធម្ម។
កាលពីវេលាម៉ោងជាង១យប់ឈានចូលថ្ងៃទី១៤ ខែសីហា ឆ្នាំ២០១៩ ដែលមានទីតាំងស្ថិតនៅតាមបណ្ដោយផ្លូវវិមានឈ្នះៗ ស្ថិតក្នុងសង្កាត់គោករកា ខណ្ឌព្រែកព្នៅ ក្រុងភ្នំពេញ។
តាមប្រជាពលរដ្ឋ ដែលរស់នៅក្បែរកន្លែងកើតហេតុបានប្រាប់ឲ្យដឹងថា នៅមុនពេលកើតហេតុពួកគាត់ បានលឺសំឡេងស្រែកឡូឡា និងស្រែកហៅឲ្យជួយផងភ្លាមៗនោះគាត់បានចេញទៅមើលក៏ឃើញមានមនុស្សមួយក្រុម ជិះម៉ូតូ៤ទៅ៥គ្រឿង និងខ្លះទៀតកំពុងតែរត់ដេញវៃជនរងគ្រោះបណ្ដាលឲ្យដួលផ្កាប់មុខ រួចក៏ជនបង្កទាំងអស់ បាននាំគ្នាឡើងជិះម៉ូតូគេចចេញពីកន្លែងកើតហេតុ បាត់ស្រមោលតែម្ដង។
បន្ទាប់ពីគេចខ្លួនចេញអស់ ប្រជាពលរដ្ឋដែលឃើញហេតុការណ៍ បាននាំគ្នារត់ទៅមើល ក៏ប្រទះឃើញបុរសរងគ្រោះដេកស្លាប់ផ្កាប់មុខ និងបែកក្បាលហូរឈាមយ៉ាងអាណោចអាធ័ម នៅនឹងកន្លែងបង្កឲ្យមានការភ្ញាក់ផ្អើលយ៉ាងខ្លាំង ហើយចំណែកឯម៉ូតូរបស់ជនរងគ្រោះវិញ គេប្រទះឃើញនៅក្នុងព្រៃ រងការខូចយ៉ាងដំណំ ប្រជាពលរដ្ឋឃើញដូចនេះ ក៏ធ្វើការផ្ដល់ដំណឹងទៅឲ្យសមត្ថកិច្ចមូលដ្ឋាន ដើម្បីឲ្យចុះមកអន្តរាគមន៍ភ្លាមៗផងដែរ។
ក្រោយពេលកើតហេតុសមត្ថកិច្ចមូលដ្ឋាន បានចុះមករួចធ្វើការទាក់ទង ទៅសមត្ថកិច្ចជំនាញផ្នែកកោសល្យវិច្ច័យ ឲ្យចុះមកធ្វើការត្រួតពិនិត្យសាកសព ស្វែងរកអត្តសញ្ញាណរបស់ជនរងគ្រោះ និងអត្តសញ្ញាណជនបង្ក ដើម្បីធ្វើស្វែងរក និងតាមចាប់ខ្លួនយកមកផ្តន្ទាទោស ទៅតាមផ្លូវច្បាប់ផងដែរ៕
