ក្រចេះ៖មជ្ឈដ្ឋានជាច្រើនរង់ចាំមើលថា តើស្តេចត្រាញ់ប្រព្រឹត្តបទល្មើសព្រៃឈើប្រចាំស្រុកស្នួល ខេត្តក្រចេះដ៏ល្បីល្បាញ គឺ ឧកញ៉ា គង់ ក្រឹង ដែលត្រូវបានលោកឧត្តមសេនីយ៍ឯក ហុង វិណុល មេបញ្ជាការរងកងរាជអាវុធហត្ថលើផ្ទៃប្រទេសនិងជាប្រធានក្រុមការងារទប់ស្កាត់និងបង្ក្រាបបទល្មើសធនធានធម្មជាតិ កោះហៅអោយចូលបំភ្លឺ នៅព្រឹកថ្ងៃទី១៥ ខែសីហា ឆ្នាំ២០១៩នេះ នៅបញ្ជាការដ្ឋានកងរាជអាវុធហត្ថខេត្តក្រចេះ នឹងមានវាសនាយ៉ាងដូចម្តេច ? ។
សូមបញ្ជាក់ថា នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និង ជាប្រធានគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ កាលពីវេលាថ្ងៃត្រង់ទី៥ ខែសីហា កន្លងទៅ បានដឹកនាំកម្លាំងជាច្រើននាក់បង្ក្រាបបទល្មេីសព្រៃឈើរបស់ឧកញ៉ាគង់ ក្រឹង នៅស្រុកស្នួល ខេត្តក្រចេះ ដែលឃ្លាតពីព្រំដែនវៀតណាមតែប៉ុន្មានគីឡូដីតែប៉ុណ្ណោះ ។
មជ្ឈដ្ឋានជាច្រើន ដឹងយ៉ាងច្បាស់ថា ឧកញ៉ា គង់ ក្រឹង ជាឈ្មួញប្រព្រឹត្តបទល្មើសព្រៃឈើដ៏ល្បីល្បាញក្នុងទឹកដីស្រុកស្នួល ខេត្តក្រចេះ មិនចាញ់ឧកញ៉ា ស៊ឹង សំអុល ឈ្មួញប្រព្រឹត្តបទល្មើសព្រៃឈើប្រចាំខេត្តមណ្ឌលគិរី ប៉ុន្មានទេ ៕
ឥ
