ព្រះសីហនុ៖ នៅព្រឹកថ្ងៃទី២០ ខែសីហាឆ្នាំ ២០១៩ រដ្ឋបាលខេត្តព្រះសីហនុ បានប្រារព្ធពិធីបើកការដ្ឋានជួសជុល ផ្លូវសម្តេចសង្ឃរាជ ទេព វង្សនិង វិថីសម្តេចតេជោ សែន ក្រោមអធិបតីភាព លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងលោក គួច ចំរើន អភិបាលខេត្តព្រះសីហនុ។
ថ្លែងក្នុងឱកាសនៃពិធីបើកការដ្ឋានជួសជុលផ្លូវនាពេលនេះឯកឧត្តម ស៊ុន ចាន់ថុល មានប្រសាសន៍ថា ជួសជុលជាបណ្តោះអាសន្នសិនដើម្បីសមហរួលការដឹកជញ្ជូន នាពេលបច្ចុប្បន្ន ផ្លូវនេះនឹងរកដៃគូដើម្បីធ្វើផ្លូវអោយមានគុណភាព ធានាការដឹកជញ្ជូនគ្រប់ប្រភេទ។ ក្រៅពីនេះក្រសួងមានគម្រោង ធ្វើផ្លូវ២ខ្សែទៀតជាផ្លូវដីក្រហមសិន ក្រោយមកនឹងប្រែក្លាយទៅជាផ្លូវបេតុង ពីចំណុចឃុំបិតត្រាំងទៅរង្វង់មូលតោ២ និងមួយខ្សែទៀត ពីព្រលានយន្តហោះកងកេង ទៅតោ២ដែរ។
ឯកឧត្តម ស៊ុន ចាន់ថុល មានប្រសាសន៍ថា នៅពេលផ្លូវនេះធ្វើហើយ ពលរដ្ឋធ្វើដំណើរចូលក្រុងព្រះសីហនុ មិនចាំបាច់ជិៈតាមផ្លូវផែទៀតទេ ការកកស្ទះចរាចរណ៍នឹងត្រូវបានកាត់បន្ថយ។ ទន្ទឹមនេះ ឯកឧត្តម ក៏បានអោយដឹងដែរថា ផ្លូវជាតិលេខ៤នឹងត្រូវពង្រីកអោយធំថែមទៀត ដោយគ្រោងបើកការដ្ឋាននៅឆ្នាំ២០២០ខាងមុខនេះ។
ជាមួយគ្នានេះ ឯកឧត្តម គួច ចំរើន អភិបាលខេត្តព្រះសីហនុ លោកបានគូរបញ្ជាក់ថា ចាប់ពីពេលនេះទៅផ្លូវនៅក្រុងព្រះសីហនុ ត្រូវធ្វើជាប្រភេទបេតុងសសៃដែកទាំងអស់ កំរាស់យ៉ាងតិច២តឹក ប្រកបដោយគុណភាពដើម្បីធានាកាដឹកជញ្ជូនគ្រប់ប្រភេទ។ អ្នកសាងសង់ត្រូវគិតពីគុណភាពជាចំបង មិនមែនធ្វើអោយតែបានវែង តែបន្តិចក្រោយមកខូចអស់វិញ បន្ទាប់មកធ្វើវិញ នាំអោយពលរដ្ឋមិនសប្បាយចិត្ត ត្អូញត្អែលំបាកធ្វើដំណើរ។
ក្រៅពីនេះឯកឧត្តម ក៏បានបញ្ជាក់អំពីគម្រោង ក្នុងការរៀបចំស្ដារប្រព័ន្ធប្រឡាយទឹកស្អុយ នៅក្នុងក្រុងព្រះសីហនុ ឲ្យមានភាពស្អប់សើចឡើងវិញផងដែរ។ តែឯកឧត្តម ថារឿងនេះជួបការលំបាកច្រើន ព្រោះពលរដ្ឋរំលោភសង់ផ្ទះលើអូរ នាំអោយស្ទះទឹកហូរ បង្កការជន់លិចតាមតំបន់ទំនាបក្នុងក្រុង បញ្ហានេះកំពុងពិភក្សារកដី សម្រាប់ដោះដូរជូនគាត់ ដើម្បីរំដោះអូរអោយបាន។
ឯកឧត្តម បញ្ជាក់ថា បើដោះរឿងនេះមិនចេញ ទឹកជំនន់លិចក្រុង នឹងនៅតែកើតមានទៀត នៅពេលមានភ្លៀងខ្លាំងម្តងៗ។
ឯកឧត្តម គួច ចំរើន បានគូសបញ្ជាក់អោយដឹងថា អ្នករស់នៅលើអូរ-ប្រឡាយ ក្នុងក្រុងព្រះសីហនុ សរុបចំនួន២០០ខ្នងផ្ទះ ក្នុងនោះ១១គ្រួសារ បានយល់ព្រមរុះរើ ទៅនៅកន្លែងដែលអាជ្ញាធររៀបចំជូន។
ទន្ទឹមនេះ ឯកឧត្តម បានស្នើអោយអ្នកកំពុងរស់នៅលើអូរទាំងអស់ សូមចូលរួមជាមួយអាជ្ញាធរ ដើម្បីធ្វើការស្តារប្រឡាយទឹកអោយប្រសើរឡើងវិញ បញ្ជៀសការជន់លិចក្រុង។
គួរបញ្ជាក់ផងដែរថា ផ្លូវដែលត្រូវបានបើកការដ្ឋានជួសជុលនៅថ្ងៃនេះមានពីរខ្សែ។ ខ្សែទី ១ ផ្លូវលេខ ខ្សែទី ១ ផ្លូវលេខ 146B ឬវិថីសម្ដេចសង្ឃរាជទេពវង្សមានប្រវែងសរុប ៣៥៨០m ខ្សែទី២ ផ្លូវលេខ ១៤៨ ជួសជុលដោយក្រាលបេតុងសរសៃដែក មានកម្រាស់ ០,២៣ម៉ែត្រនៅលើកំណាត់ផ្លូវប្រវែង 2355 ម។
សូមបញ្ជាក់ថាផ្លូវសម្ដេចសង្ឃទេព វង្ស នេះមានប្រវែងសរុប ២៤ គីឡូភ្ជាប់ពីផ្លូវជាតិលេខ ៤ឆ្ពោះទៅរង្វង់មូលស្រុកស្ទឹងហាវ មានស្ពានឆ្លថកាត់ ចំនួន ២១ និងលូកាត់ទទឹងផ្លូវចំនួន ៤៣ កន្លែង ជាផ្លូវវាងក្រុងដ៏មានសារៈសំខាន់សម្រាប់ រថយន្តដឹកទំនិញធុនធ្ងន់ដឹកទំនិញនិងដឹកប្រេង។
ចំណែកវិថីសម្ដេចតេជោហ៊ុនសែន មានទីតាំងពីរចំណុចបំបែកផ្លូវជាតិលេខ ៤ត្រង់ចំណុចមុខកំពង់ផែអន្តរជាតិក្រុងព្រះសីហនុ ឆ្ពោះទៅភ្ជាប់នឹងផ្លូវលេខ ១៤៦Bរង្វង់មូល ស្រុកស្ទឹងហាវ ខេត្តព្រះសីហនុ ២៣ គីឡូម៉ែត្រ មានស្ពានឆ្លងកាត់២កន្លែងនិងលូកាត់ទទឹងថ្នល់ ៤៨ កន្លែងជាប្រភេទផ្លូវចាស់ ដែលបានកសាងឡើងតាំងពីសម័យសង្គមរាស្រ្តនិយមមកម្លេះ៕
