ស្វាយរៀង៖ លោកស្រីកិត្តិសង្គហបណ្ឌិតម៉ែន សំអនប្រធានក្រុមការងាថ្នាក់ជាតិចុះជួយខេត្តស្វាយរៀងបានថ្លែងថា មន្ត្រីរាជការ បុគ្គលិកសុខាភិបាល នៅគ្រប់ជាន់ថ្នាក់ទាំងអស់ ត្រូវ បន្តការខិតខំអនុវត្តភារកិច្ចរបស់ខ្លួនដោយស្មារតីទទួលខុសត្រូវខ្ពស់ ជាពិសេស ការលុបបំបាត់សេវាសុខាភិបាលខុសច្បាប់ និងឱសថក្លែងក្លាយដើម្បីផ្ដល់ សេវាសុខភាពឱ្យកាន់តែមានគុណភាព សំដៅលើកកម្ពស់ប្រសិទ្ធភាពនៃការ ការពារ-សុខភាព និងព្យាបាលឱ្យកាន់តែប្រសើឡើង។
ការថ្លែងបែបនេះនៅក្នុងឱកាសដែលលោកស្រីបានអញ្ជើញសម្ភោធដាក់ឲ្យប្រើប្រាស់ជាផ្លូវការមន្ទីរពេទ្យបង្អែកសាមគ្គីស្រុករំដួល ស្ថិតនៅឃុំកំពង់ចក ស្រុករំដួល ខេត្តស្វាយរៀងនៅព្រឹកថ្ងៃទី២០ខែសីហាឆ្នាំ២០១៩ ដែលចំណាយថវិការអស់ប្រមាណ៥៦មុឺនថវិកាជាអំណោយរបស់សម្តេចអគ្គមហាសេនាបតីតេជោ ហ៊ុន សែន តាមរយៈ លោក ខ្វាន់ ស៊ាម ប្រធានក្រុមការងារគណបក្សប្រជាជនកម្ពុជាចុះជួយស្រុករំដួលនិងសម្បុរសជន។
លោកស្រីម៉ែន សំអនបានលើកឡើងថាក្នុងនាមរាជរដ្ឋាភិបាលកម្ពុជា ក្រុមការងារគណៈកម្មាធិការកណ្តាល ចុះជួយខេត្តស្វាយរៀង និងក្នុងនាមលោកស្រីផ្ទាល់សូមគាំទ្រចំពោះសម្តេចតេជោ នាយករដ្ឋមន្ត្រី ដែលបានយកចិត្តទុកដាក់អំពីសុខុមាលភាពរបស់ប្រជាពលរដ្ឋនៅតាមមូលដ្ឋាន ដោយបានបង្កើតឲ្យមានមន្ទីរពេទ្យ ឬមណ្ឌលសុខភាពឲ្យនៅជិតផ្ទះរបស់ប្រជាពលរដ្ឋ ដើម្បីចូលរួមចំណែកក្នុងការកាតប់បន្ថយនូវភាពក្រីក្រ ស្របតាមយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ដែលមានវិស័យសុខាភិបាលជាវិស័យអាទិភាព ។
លោកស្រីម៉ែន សំអនបានណែនាំដល់បុគ្គលិកពេទ្យទាំងអស់ជាពិសេសមន្ទីរពេទ្យបង្អែកនេះ ដែល កំពុងធ្វើប្រតិបត្ដិការផ្ដល់សេវាលើការសង្គ្រោះ និងពិនិត្យ ព្យាបាលជម្ងឺជូន ប្រជាជន សូមប្រកាន់ភ្ជាប់នូវក្រមសីលធម៌វិជ្ជាជីវៈ និងតម្ដល់នូវទឹកចិត្ដ អាណិត ស្រលាញ់អ្នកជម្ងឺ ដែលជាអ្នកមកទទួល និងប្រើប្រាស់សេវានៅ មន្ទីរពេទ្យ។
បុគ្គលិកពេទ្យត្រូវមានកាយវិការទន់ភ្លន់ សម្តីផ្អែមល្ហែម ចេះគួរ សម សុភាពរាបសារ ដាក់អ្នកជម្ងឺ។ ម្យ៉ាងទៀតលោកស្រីស្នើ មន្ទីរពេទ្យ ទាំងអស់ ត្រូវថែររក្សាអនាម័យ ភាពស្អាតស្អំ គ្មានធូលី និងមេរោគ ជា ជាពិសេស ត្រូវសំអាតសម្ភារៈបរិក្ខាពេទ្យ កម្រាលឥដ្ឋ បន្ទប់អ្នកជម្ងឺ និងទីធ្លា ពេទ្យទាំងមូលជាប្រចាំ៕
