ភ្នំពេញ៖ លោក ហែម ដារិទ្ធិ អភិបាល នៃគណះអភិបាលខណ្ឌពោធិ៍សែនជ័យ និងលោក ប៊ិន សុជី អនុប្រធានមន្ទីរសោរយោដីរាជធានីភ្នំពេញ រួមនឹងមន្ត្រីពាក់ព័ន្ធ បានអញ្ជើញជាអធិបតី ក្នុងពិធីប្រកាសចែកវិញ្ញាបនប័ត្រ សម្គាល់ម្ចាស់អចលនវត្ថុ ចំនួន ១៩៦៥ក្បាលដី។
ពិធីនេះ ត្រូវបានធ្វើឡើងនៅព្រឹកថ្ងៃពុធ ១៣រោច ខែស្រាពណ៌ ឆ្នាំកុរ ឯកស័ក ពស២៥៦៣ ត្រូវនឹងថ្ងៃទី២៨ សីហា ឆ្នាំ២០១៩ ស្ថិតនៅភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
ថ្លែងក្នុងឱកាសនោះ លោក ហែម ដារិទ្ធិ អភិបាល នៃគណៈអភិបាលខណ្ឌពោធិ៍សែនជ័យ មានប្រសាសន៍កោតសរសើរ ចំពោះក្រុមការងារចុះបញ្ជីដីធ្លី និងអ្នកពាក់ព័ន្ធទាំងអស់ ដែលខិតខំសម្រេចកិច្ចការនេះ ដោយការទទួលខុសត្រូវ និងតម្លាភាព។ លោកអភិបាលខណ្ឌ បានគូសបញ្ជាក់ថា ក្បាលដីដែលបងប្អូន បានចុះបញ្ជី នៅក្នុងសៀវភៅគោលបញ្ជីដីធ្លី និងទទួលបានប័ណ្ណកម្មសិទ្ធិនេះ គឺបានបំពេញលក្ខណ្ឌគ្រឹះដ៏រឹងមាំ ដែលធានាដោយរដ្ឋ និងការពារដោយច្បាប់ ហើយក៏ជាលក្ខណ្ឌសំខាន់ សម្រាប់ការប្រើប្រាស់បណ្ណដី។ ដូច្នេះការចុះបញ្ជី គឺជាការពង្រឹងសុវត្ថិភាព នៃការកាន់កាប់ដីធ្លី ដែលនឹងជម្រុញការប្រើប្រាស់ដីធ្លី ឲ្យអស់សក្ដានុពល ហើយកត្តានេះ ពិតជាបានបញ្ចប់ជម្លោះ និងវិវាទដីធ្លី ជាពិសេស ការកាត់បន្ថយភាពក្រីក្រ ដែលជាគោលនយោបាយ ជម្រុញការចុះបញ្ជីដីធ្លី របស់រាជរដ្ឋាភិបាល។
លោកអភិបាន បានបញ្ជាក់ផងដែរថា ប័ណ្ណកម្មសិទ្ធិ ដែលបងប្អូនទទួលបាននៅថ្ងៃនេះ គឺជាឯសារមួយសំខាន់ណាស់ ជាឯកសារតំណាងឲ្យទ្រព្យរបស់បងប្អូន ជាឯកសារតំណាងឲ្យសិទ្ធិ នៃកម្មសិទ្ធផ្ដាច់មុខ របស់កម្មសិទ្ធិករ លើដីធ្លីរបស់ខ្លួន ក្នុងការប្រើប្រាស់ និងអាស្រ័យផល ក្នុងការលក់ដូរ ការផ្ទេរទៅអ្នកដទៃ ការផ្ទេរទៅឲ្យកូនចៅ។ អាស្រ័យហេតុនេះ សូមបងប្អូនរក្សាប័ណ្ណនេះ ឲ្យបានល្អប្រសើរ ជៀសវាងការធ្លាក់ទៅដល់ដៃរបស់ជនទុច្ចរឹត ហើយយកទៅប្រើប្រាស់ក្នុងអំពើអាក្រក់ និងអំពើផ្សេងៗទៀត នាំឲ្យមានការលំបាក ដល់បងប្អូន ដែលជាម្ចាស់កម្មសិទ្ធិផ្ទាល់ ។
ជាមួយគ្នានេះដែរ លោកអភិបាលខណ្ឌ បានសង្កត់ធ្ងន់ថា នេះគឺជាយុទ្ធសាស្រ្តចតុកោណ របស់រាជរដ្ឋាភិបាល លើវិស័យដីធ្លី គឺធ្វើយ៉ាងឲ្យប្រជាពលរដ្ឋគ្រប់គ្នា ទទួលបាននូវប័ណ្ណកម្មសិទ្ធដីធ្លី និងក៏ជាយុទ្ធសាស្រ្តកាត់បន្ថយភាពក្រីក្រផងដែរ។
លោកអភិបាល ក៏បានសសំណូមពរដល់ បងប្អូនប្រជាពលរដ្ឋទាំងអស់ សូមចូលរួមថែរក្សាអនាម័យ បរិស្ថាន ក្នុងមូលដ្ឋាន ឲ្យបានស្អាតល្អជានិច្ច ដោយវេចខ្ចប់សម្រាម និងទុកដាក់ឲ្យបានត្រឹមត្រូវ ដាក់តាមពេលម៉ោងកំណត់ ងាយស្រួលក្រុមហ៊ុនប្រមូលសម្រាម ប្រមូលយកទៅចោល ហើយជាពិសេស រាល់ការលក់ដូរ ធ្វើអជីវកម្មផ្សេងៗ សូមកុំរំលោភលើចិញ្ចើមផ្លូវ។
ដោយឡែក លោក ប៊ិន សុជី អនុប្រធានមន្ទីរសោរិយោដីរាជធានីភ្នំពេញ បានថ្លែងថា ការចុះបញ្ជីដីធ្លីមានលក្ខណៈជាប្រព័ន្ឋ ជាវិធីសាស្រ្តមួយ ដែលយើងអាចធ្វើការចុះបញ្ជីដីធ្លី បានយ៉ាងច្បាស់មានប្រសិទ្ឋិភាព មានតម្លាភាព និងធានាបាននូវភាពកក់ក្តៅ ជូនបងប្អូនប្រជាពលរដ្ឋ ក្នុងការកាន់កាបដីធ្លី និងធានាសុវត្ថិភាពដីធ្លី។ ការគ្របគ្រងដីធ្លីបានល្អ ជាមូលដ្ឋានឲ្យរដ្ឋ គិតគូរប្រមូលចំណូលចូលថវិកាជាតិ និងផ្តល់លក្ខណៈងាយស្រួល ដល់ការជំរុញកិច្ចវិនិយោគ លើកស្ទួយសេដ្ឋកិច្ចជាតិ។ ម្យ៉ាងទៀត គឺជាការរួមចំណែកយ៉ាងពិតប្រាកដ ក្នុងការអនុវត្តនយោបាយ របស់រាជរដ្ឋាភិបាល ក្នុងការកាត់បន្ថយភាពក្រីក្រ ការអភិវឌ្ឍន៍សង្គម ប្រកបដោយចីរភាព។ លោកបានបន្ថែមថា មុននឹងចេញប័ណ្ណកម្មសិទ្ធសម្គាល់អចលនវត្ថុ គឺក្រុមមន្រ្តីជំនាញសូរិយាដី បានចុះមកធ្វើការវាស់វែង ក្បាលដីជូនប្រជាពលរដ្ឋ ជាច្រើនខែមកហើយ តែថ្ងៃនេះ គឺបានទទួលនូវប័ណ្ណកម្មសិទ្ធជាផ្លូវការហើយ៕
ក្នុងឱកាសនេះដែរ បងប្អូនប្រជាពរដ្ឋដែលបានទទួល វិញ្ញាបនប័ត្រសម្គាល់ម្ចាស់អចលនវត្ថុ បានថ្លែងអំណរអរគុណ ដល់មន្ទីរជំនាញ និងអជ្ញាធរដែនដីគ្រប់រំដាប់ថ្នាក់ ដែលបានយកចិត្តទុកដាក់ ក្រោមការដឹកនាំដ៏ឆ្លាសវៃ ប្រកបដោយគតិបណ្ឌឹត របស់ប្រមុខរាជរដ្ឋាភិបាល ដែលមាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕
