ព្រះសីហនុ៖រសៀលថ្ងៃទី ២៨ ខែសីហាឆ្នាំ ២០១៩ អភិបាលខេត្តព្រះសីហនុ អមដំណើរដោយមន្ត្រីជាច្រើនរូបទៀតបានអញ្ជើញចុះពិនិត្យមើលស្ថានភាពផ្លូវនិងប្រពន្ធ័ប្រឡាយក្នុងភូមិ២,ភូមិ៣នៃសង្កាត់លេខ៤ក្រុងព្រះសីហនុ ខណៈតំបន់ទំនាបនេះនៅតែប្រឈមនៅឡើយ។
ប្រឈមដោយហេតុថាប្រព័ន្ធលូ-ប្រឡាយនៅតំបន់ទំនាបនេះរងការរំលោភនិងស្ទះដោយកន្លែង បានបណ្តាលឲ្យស្ទះចរន្តទឹកហូរ
បង្កការលិចលង់និងការលំបាកដល់ប្រជាជន។
ប្រជាពលរដ្ឋ និយាយថា ពួកគាត់កំពុងតែជួបបញ្ហាលំបាកណាស់ សូមស្នើសុំ ឯកឧត្តម អភិបាលខេត្ត ជួយសម្របសម្រួលដោះស្រាយ
ប្រព័ន្ធបង្ហូរទឹកនិងផ្លូវថ្នល់ជូនពួកគាត់ផង។
ឆ្លើយតបចំពោះកង្វល់និងសំណូមពររបស់ប្រជាពលរដ្ឋខាងលើនេះ ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុបានគូសបញ្ជាក់ថា នឹងឲ្យមន្ត្រីជំនាញចុះធ្វើការសិក្សាកាយដាក់លូបង្ហូចូលទៅប្រឡាយមេ ដើម្បីដោះស្រាយបញ្ហាការលំបាកទាំងនេះជូនប្រជាពលរដ្ឋ។
ចំពោះមុខអភិបាលខេត្ត បានមានប្រសាសន៍បញ្ជាក់បន្ថែមថានឹងឲ្យមន្ត្រីជំនាញចុះធ្វើការសិក្សាបន្ទាន់និងកាយដាក់លូរំដោះទឹកពីចំណុចដែលកំពុងតែដក់ទឹកលិចលង់ដោយដាក់លូរំដោះទឹកចេញពីចំណុចដែលកំពុងតែដក់ទឹកនេះអោយវាហូរ
ឆ្ពោះទៅប្រឡាយមេដែលហូរបន្តចូលទៅស្ថានីយ៍បូមទឹកកខ្វក់នៅចំណុច sokha hotel ធ្វើយ៉ាងណាដោះស្រាយចំពោះមុខនៅបញ្ហាប្រឈមដែលកំពុងតែកើតមានឡើងលើបងប្អូនប្រជាពរដ្ឋនៅក្នុងតំបន់មួយនេះ។
ឯកឧត្តម គួច ចំរើន បញ្ជាក់បន្ថែមថាក្រៅពីស្តារផ្លូវទឹកនេះ ខេត្តក៏មានការរៀបចំកែលំអនូវរាល់ហេដ្ឋារចនាសម្ព័ន្ធប្រព័ន្ធអូរ លូឬឡាយនៅក្នុងក្រុងព្រះសីហនុទាំងមូលផងដែរ។
គូរបញ្ជាក់ផងដែរថាចាប់តាំងពីអាមានគ្រោះជំនន់ទឹកភ្លៀងរយៈកាលប៉ុន្មានជាកន្លះខែកន្លងមកនេះ យុទ្ធនាការក្នុងការស្តារប្រព័ន្ធប្រឡាយបង្ហូរទឹកនៅក្នុងក្រុងព្រះសីហនុកំពុងតែបន្តសកម្មភាពជាប្រចាំ។
ទន្ទឹមនឹងការកាយប្រឡាយឬកាយដាក់លូ រដ្ឋបាលខេត្ត ក៏បានជំរុញឲ្យមន្ត្រីជំនាញធ្វើការស្តារនិងជួសជុលផ្លូវជាបណ្តោះអាសន្នដែរ ដោយធ្វើការលុបគន្លុក សំបុកមាន់ដើម្បីសម្រួលការធ្វើដំណើររបស់ប្រជាពលរដ្ឋ ខណៈគម្រោងជួសជុលកែលម្អផ្លូវប្រមាណជាង ២០ ខ្សែនៅក្នុងក្រុងព្រះសីហនុត្រូវបានរាជរដ្ឋាភិបាលបានអនុម័តរួចរាល់ដើម្បីកែលម្អហេដ្ឋារចនាសម្ព័ន្ធនៅក្រុងព្រះសីហនុឲ្យបានល្អប្រសើរឡើងវិញ៕
