ស្ទឹងត្រែង៖ ស្របពេលដែលខេត្តស្ទឹងត្រែង ស្ថិតក្នុងស្ថានភាពអាកាសធាតុអាប់អួរ ហើយទឹកទន្លេកំពុងហក់ឡើង ជាបន្តបន្ទាប់នោះ អាជ្ញាធរបានណែនាំឲ្យប្រជាពលរដ្ឋ នៅក្នុងក្រុងស្ទឹងត្រែង ក៏ដូចជាប្រជាពលរដ្ឋ ដែលមានលំនៅដ្ឋាននៅក្បែរទន្លេសូមឲ្យមានការប្រុងប្រត័ត្នខ្ពស់ចំពោះគ្រោះមហន្តរាយទឹកជំនន់ ។
ខណៈដែលទឹកទន្លេសេកុងឡើងដល់១១ម៉ែត្រ ជិតដល់កម្រិតប្រកាសអាសន្ន និងទឹកទន្លេមេគង្គ កម្ពស់ទឹកឡើង១០,៨២ម៉ែត្រ ខណៈប្រកាសអាសន្ននូវកម្ពស់ទឹក១០,៧០ម៉ែត្រនោះ អាជ្ញាធរខេត្ត ក៏បានអំពាវនាវឲ្យមានការប្រុងប្រយ័ត្ន ទាំងនៅក្នុងក្រុង និងនៅទីជនបទ គឺត្រូវត្រៀមលក្ខណៈឲ្យបានហ្មត់ចត់ ជាពិសេស សត្វពាហនៈ និងទ្រព្យសម្បត្តិមានតម្លៃជម្លៀសទៅកាន់ទីទួលមានសុវត្ថិភាព ដើម្បីបញ្ជៀ
សនូវរាល់គ្រោះថ្នាក់ផ្សេងៗ ដែលកើតឡើងជាយថាហេតុ ដោយប្រការណាមួយនោះ ។
លោក ប៉ាង ប៉េង ប្រធានមន្ទីរធនធានទឹក និងឧតុនិយមខេត្តស្ទឹងត្រែង បានឲ្យដឹងថា:ស្ថានភាពទឹកទន្លេមេគង្គ ពីថ្ងៃនេះទៅ គឺហក់ឡើងជាបន្តបន្ទាប់ វានឹងអាចឡើងដល់ ឬលើសកម្រិតប្រកាសអាសន្ន រហូតដល់ថ្ងៃទី០៥កញ្ញាខាងមុខ ទឹកឡើងដល់១១ម៉ែត្រជាង ដូច្នេះ ការជូនដំណឹងទៅតាមស្រុក និងឃុំនោះ គឺខាងមន្ទីរបានជូន ដំណឹងរួចរាល់អស់ហើយ ដើម្បីឲ្យមានការត្រៀម ក៏ដូចជាប្រុងប្រយ័ត្នកម្ពស់ទឹក នៅតាមដងទន្លេមេគង្គ ហើយការហក់ឡើងខ្លាំងនូវកម្ពស់ទឹកនេះ គឺដោយសារទទួលរងនូវព្យុះទី១៣ ឈ្មោះលីលី បានជះឥទ្ធិ
ពលមកលើប្រទេសកម្ពុជា ខណៈព្យុះនេះ កំពុងស្ថិតនៅសមុទ្រវៀតណាម ត្បិតតែយើងរងនូវចំហាយរបស់ព្យុះនេះមែន តែតំបន់មេគង្គខាងលើ បានរងសំពាធទាប បណ្តាលឲ្យលិចខ្លាំងក្នុងអាងមេគង្គ ទើបបន្តឲ្យទន្លេមេគង្គហក់ឡើងខ្ពស់ដល់កម្រិតប្រកាសអាសន្ន និងលើប្រកាសអាសន្ន។
ដោយឡែក នៅព្រឹកថ្ងៃទី០៤កញ្ញានេះ ភូមិមួយចំនួនក្នុងក្រុងស្ទឹងត្រែង ត្រូវបានជន់លិចជាបណ្តើរៗហើយ ប៉ុន្តែខូចខាត និងរងផលប៉ះពាល់លើផ្ទះសម្បែងរបស់ប្រជាពលរដ្ឋមានទំហំប៉ុន្មាននោះ គឺនៅមិនទាន់ដឹងនៅឡើយទេ ៕
