កំពង់ចាម៖ ស្របពេលដែលក្រសួងធនធានទឹកនិងឧតុនិយម បានធ្វេីសេចក្តីជូនដំណឹង ក្នុងកំឡុងពេល ៣-៥ ថ្ងៃខាងមុខទៀត ទឹកទន្លេមេគង្គលើរបស់កម្ពុជាអាចនឹងហក់ឡើង ហើយក៏សូមឲ្យស្ថាប័នពាក់ព័ន្ធ និងអាជ្ញាធរដែនដី ពិសេសបងប្អូនប្រជាពលរដ្ឋដែលរស់នៅអមសងខាងទន្លេ បង្កើនការប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ។
ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម នារសៀលថ្ងៃទី០៤ ខែកញ្ញា ឆ្នាំ២០១៩នេះ បានដឹកនាំមន្ទីរអង្គភាពពាក់ព័ន្ធជុំវិញខេត្ត ចុះពិនិត្យមេីលទីទួលសុវត្ថិភាពជាច្រេីនកន្លែង ដូចជាក្នុងឃុំកោះមិត្ត ស្រុកកំពង់សៀម និងទីទួលសុវត្ថិភាពកំពុងសំណាញ់ ឃុំមៀន ស្រុកព្រៃឈរ ដេីម្បីត្រៀមរៀបចំបង្ការជួយសង្គ្រោះបងប្អូនប្រជាពលរដ្ឋ សត្វពាហនៈ ជាដេីម ខណៈពេលដែលទឹកទន្លេមេគង្គខេត្តកំពង់ចាម នៅតែបន្តហក់ឡេីងឥតឈប់ឈរ។
ឯកឧត្ដម អ៊ុន ចាន់ដា អភិបាលខេត្តកំពង់ចាម បានអំពាវនាវដល់ប្រជាពលរដ្ឋរស់នៅតាមបណ្ដោយដងទន្លេមេគង្គ តោងប្រុងប្រយ័ត្នជានិច្ច បើទោះបី ជាពេលនេះ កម្រិតកម្ពស់ទឹកនៅខេត្តកំពង់ចាម មិនស្ថិតនៅចំណុចប្រកាសអាសន្ន នៅឡើយក្ដី ។
ក្រៅពីនោះ ប្រសិនបើ បងប្អូនប្រជាពលរដ្ឋយើងមានតម្រូវការកងកម្លាំង ដើម្បី ចុះជួយអន្តរាគមន៍ រុះរើលំនៅដ្ឋាន សូមរាយការណ៍មកអាជ្ញាធរមូលដ្ឋាន ជាបន្ទាន់ ។ ទន្ទឹមនឹងនោះដែរ អាជ្ញាធរមូលដ្ឋាន ត្រូវនៅក្បែរប្រជាពលរដ្ឋ ដើម្បី ជួយសង្គ្រោះ និងជម្លៀសពួកគាត់ ឲ្យទាន់ពេលវេលា ផងដែរ ។
បេីយោងតាមរបាយការណ៍របស់មន្ទីរធនធានទឹក និងឧត្តុនិយមខេត្តកំពង់ចាម បានបញ្ជាក់ថា សម្រាប់ខេត្តកំពង់ចាម ចាប់គិតត្រឹមថ្ងៃទី៤ កញ្ញា ២០១៩នេះ ទឹកទន្លេមេគង្គបានហក់ឡើងចូលតាមដងព្រែកបឹងបួរនានាសឹងតែ១០០%ហេីយ ដោយទឹកមានកម្ពស់១៣.៦០ម៉ែត្រ បេីប្រៀបធៀបនឹងថ្ងៃម្សិលមិញកេីនឡេីង០.២៧ម៉ែត្រ ដោយឡែកឆ្នាំ២០១៨កន្លងទៅទឹកមានកម្ពស់១៥.៣៣ម៉ែត្រ ខណៈដែលកម្ពស់ទឹកត្រូវប្រកាសអាសន្ន១៥.២០ម៉ែត្រ ៕
