ភ្នំពេញ៖ លោក វរសេនីយ៍ទោ សុខ ហេង អធិការនគរបាលខណ្ឌទួលគោក នៅព្រឹកថ្ងៃសុក្រ ទី៦ ខែមីនា ឆ្នាំ២០២០
បានអញ្ជើញជួបសំណេះសំណាល ជាមួយកងកម្លាំងស្រ្តីទាំងអស់ នៃអធិការដ្ឋាននគរបាលខណ្ឌទួលគោក ដើម្បីអបអរសាទរខួបលើកទី១០៩ ទិវានារីអន្តរជាតិ ០៨ មីនា ឆ្នាំ២០២០ ក្រោមប្រធានបទ ” មានសន្តិភាព មានការលើកកម្ពស់សមាសភាពយែនឌ័រ “។
ក្នុងឱកាសនោះ លោកស្រីអនុសេនីយ៍ឯក អេង ផល្លី តំណាងនារីនៃអធិការដ្ឋាននគរបាលខណ្ឌទួលគោក បានឡើងអាន ព្រះរាជសាររបស់សម្តេចព្រះមហាក្សត្រី នរោត្តម មុនិនាថសីហនុ ព្រះវរៈរាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល។
ជាកិច្ចបញ្ចប់ លោក សុខ ហេង ក៏បានប្រគល់បាច់ផ្កា និងវត្ថុអនុស្សាវរីយ៍ ជូនដល់កងកម្លាំងដែលជាស្រ្តី ផងដែរ៕
