ភ្នំពេញ ៖ បុរសវ័យកណ្ដាលម្នាក់ ចេញពីកម្មវិធីមិត្តភក្តិវិញ សង្ស័យស្រវឹងស្រាខ្លាំងហើយ ទើបបើករថយន្តទៅបុកគល់ស្ពានអាកាសផ្សារដីហុយ បណ្ដាលឲ្យរងការខូចខាតយ៉ាងដំណំផ្នែកខាងមុខ កាលពីវេលាម៉ោង១០និង៤០នាទីយប់ ថ្ងៃទី០៥ ខែមីនា ឆ្នាំ២០២០ ស្ថិតនៅតាមបណ្ដោយផ្លូវសហព័ន្ធរុស្ស៊ី ក្នុងសង្កាត់អូបែកក្អម ខណ្ឌសែនសុខ រាជធានីភ្នំពេញ។
ប្រភពព័ត៌មានសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ មានរថយន្តមួយគ្រឿងម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ 2AS-5509 បើកបរដោយបុរសវ័យកណ្ដាលម្នាក់ ក្នុងទិសដៅពីលិចទៅកើត បើកបរក្នុងសភាពស្រវឹងស្រាជោកជាំ ហើយលឿនទៀតនោះ ក៏រេចង្កូតទៅបុកគល់ស្ពានអាកាសផ្សារដីហុយពេញទំហឹង បណ្ដាលឲ្យរថយន្តកៀបជាប់នឹងបង្កាន់ដៃស្ពានសំណាងល្អម្ចាស់រថយន្តមិនរបួស។
ក្រោយពេលកើតហេតុ សមត្ថកិច្ចមូលដ្ឋានចុះទៅដល់កន្លែងកើតហេតុ និងទំនាក់ទំនងទៅខាងជំនាញចរាចរណ៍ នៃស្នងការនគរបាលរាជធានីភ្នំពេញ ចុះមកធ្វើការវាស់វែង និងស្ទូចរថយន្តទៅរក្សាទុក រង់ចាំដោះស្រាយនៅពេលក្រោយ៕
