ខ្ញុំបាទ រាជ សារ៉េត តំណាងឲ្យក្រុមគ្រួសារនៃសពអ្នកម្ដាយក្មេក ផុក ខាន់ ដែលបានទទួលមរណៈភាពកាលពីថ្ងៃទី៣ ខែមេសា ឆ្នាំ២០២០ ដោយរោគាពាធ ស្ថិត ភូមិបឹងតាព្រាម សង្កាត់ត្រើយកោះ ក្រុងកំពត ខេត្តកំពត មានកិត្តិយសដ៏ខ្ពង់ខ្ពស់ សូមសម្ដែងនូវអំណរគុណ យ៉ាងជ្រាលជ្រៅ និងខ្ពង់ខ្ពស់ ជូនចំពោះ ឯកឧត្តម លោកជំទាវ លោកឧកញ៉ា លោក លោកស្រី និងញាតិមិត្តជិតឆ្ងាយទាំងអស់ ដែលមានសមានចិត្ត និងមនោសញ្ចេតនាដ៏ជ្រាលជ្រៅ និងឧត្តុង្គឧត្តម បានអញ្ជើញចូលរួមផ្ទាល់ និងផ្ញើសាររំលែកទុក្ខ ដ៏សែនក្រៀមក្រំ និងការសោកស្ដាយជាពន់ពេកជាមួយក្រុមគ្រួសារយើងខ្ញុំ។
កាយវិការដ៏ប្រពៃខាងលើ បានបញ្ជាក់ឲ្យឃើញយ៉ាងច្បាស់នូវទឹកចិត្តគោរពស្រលាញ់រាប់អាន ដ៏ស្មោះស្ម័គ្រ និងជ្រាលជ្រៅ បំផុតរបស់ ឯកឧត្តម លោកជំទាវ លោកឧកញ៉ា លោក លោកស្រី និងញាតិមិត្តជិតឆ្ងាយទាំងអស់ចំពោះសព និងក្រុមគ្រួសារខ្ញុំបាទ។ ខ្ញុំបាទ និងក្រុមគ្រួសារ សូមចងចាំជានិច្ចនូវមនោសញ្ចេតនា ដ៏ជ្រាលជ្រៅ និងឧត្តុង្គឧត្តមនេះ។
ជាមួយនេះខ្ញុំបាទ និងក្រុមគ្រួសារទាំងអស់ សូមជូនពរសព្ទសាធុការ ចំពោះឯកឧត្តម លោកជំទាវ លោកឧកញ៉ា លោក លោកស្រី និងញាតិមិត្តជិតឆ្ងាយទាំងអស់ សូមប្រកបដោយពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។
សូមឯកឧត្តម លោកជំទាវ លោកឧកញ៉ា លោក លោកស្រី និងញាតិមិត្តជិតឆ្ងាយទាំងអស់ មេត្តាទទួលនូវការគោរពរាប់អានដ៏ជ្រាលជ្រៅ ពីយើងខ្ញុំ។
