ស្វាយរៀង៖ រដូវផ្សិតផ្ចាក់បានមកដល់ហើយ ពលរដ្ឋនៅភូមិព្រៃផ្ដៅ សង្កាត់បាទី ក្រុងបាវិត នាំគ្នាសម្រុកទៅដកផ្សិតយកមកលក់ ដោយបានតម្លៃសមរម្យ បន្ថែមចំណូលក្នុងការផ្គត់ផ្គង់ជីវភាពបានមួយកម្រិត។
បើតាមស្ត្រីម្នាក់កំពុងលក់ផ្សិតផ្ចាក់ បានឲ្យដឹងថា សម្រាប់ក្រុមគ្រួសារគាត់ ពេលទំនេរបាននាំគ្នាទៅដកផ្សិត នៅតាមព្រៃផ្ចាក់ នឹងប្រេងខ្យល់ នៅតាមសហគមន៍ព្រៃកូនគគី នៅក្រុងបាវិត ដើម្បីយកមកលក់។
ដោយក្រុមគ្រួសាររបស់គាត់មានគ្នា៥នាក់ ដកផ្សិតចាប់តាំងពីម៉ោង ២និង០០នាទីយប់ រហូតដល់ម៉ោង៥ទៀបភ្លឺ អ្នកខ្លះបាន១គីឡូ និងអ្នកខ្លះទៀត ដកបានដល់ទៅ៥គីឡូក្រាម ទៅតាមសហគមន៍ផ្សេងគ្នា ដែលមានផ្សិតដុះតិច ច្រើន ហើយយកមកលក់នៅតាមចញ្ចើមផ្លូវជាតិលេខ ១ ដោយមានអ្នកធ្វើដំណើរឆ្លងកាត់ ឈប់ទិញដោយឃើញផ្សិតផ្ចាក់ធម្មជាតិ ។ ចំណែកតម្លៃផ្សិតផ្ចាក់វិញ១គីឡូក្រាម លក់ចេញបាន២០០០០រៀល ទៅ៣០០០០រៀល គឺមានតម្លៃខ្ពស់គួរសម។
ស្ត្រីដដែលបានបន្តទៀតថា ក្រៅពីការងាររោងចក្រនិងនិងស្រែចម្ការនោះ ហើយគួបផ្សំនៅរដូវនេះ មានភ្លៀងធ្លាក់មួយមេពីរមេមក មានផ្សិតដុះ អ្នកស្រុកអ្នកភូមិក៏នាំគ្នាទៅដក យកមកទុកធ្វើម្ហូបអាហារ នឹងយកមកលក់យកថវិការ ផ្គត់ផ្គង់ជីវភាពគ្រួសារ។
ប្រភពខាងលើបានបញ្ជាក់បន្ថែមថា ការដកផ្សិតនេះមិនមែនជាអាជីពប្រចាំ ដូចការងាររោងចក្រនិងធ្វើស្រែចម្ការ ឬលក់ដូរនោះទេ គ្រាន់តែបានថវិការបន្តិចបន្ទួច ដើម្បីផ្គត់ផ្គង់បន្ថែមប៉ុណ្ណោះ ព្រោះផ្សិតដុះនៅតែដើមឆ្នាំ គឺនៅពេលភ្លៀងធ្លាក់ដំបូង ហើយមានរយៈពេលដុះផ្សិតវិញ ប្រហែលជាបីខែ ហើយក៏មិនអាចដកបានរាល់ថ្ងៃនោះទេ។
សូមបញ្ជាក់ថាផ្សិតផ្ចាក់ គឺអ្នកខេត្តស្វាយរៀងចូលចិត្តបរិភោគខ្លាំងណាស់ គឺអាចយកទៅធ្វើមុខម្ហូបបានច្រើនមុខដូចជា ស្លរម្សៅ ឆាជាមួយសាច់គោ ជ្រូក ខសាច់ជាដើមដោយមានរស់ជាតិល្វីងតិចៗប៉ុន្តែឆ្ញាញ់៕
