ស្វាយរៀង៖នាព្រឹកថ្ងៃចន្ទ ៦កើត ខែពិសាខ ឆ្នាំជូត ទោស័ក ព.ស២៥៦៣ ត្រូវនឹងថ្ងៃទី២៧ ខែមេសា ឆ្នាំ២០២០នេះ លោក តឹក ពិសិដ្ឋ អភិបាលរងស្រុក តំណាង លោក សុច ពិសី អភិបាល នៃគណៈអភិបាលស្រុកកំពង់រោទិ៍ និងជាសមាជិកអនុគណៈកម្មការសុវត្ថិភាពចរាចរណ៍ផ្លូវគោកខេត្ត បានអញ្ជើញជាអធិបតីក្នុងកិច្ចប្រជុំផ្សព្វផ្សាយ អនុក្រឹត្យលេខ៣៩ ស្ដីពីការកែសម្រួលអនុក្រឹត្យលេខ៤៤ អនក្រ.បក ចុះថ្ងៃទី២១ ខែមីនា ឆ្នាំ២០១៧ ស្ដីពីការពិន័យអន្តរការណ៍ចំពោះអំពើល្មើសនឹងច្បាប់ស្ដីពីចរាចរណ៍ផ្លូវ គោក ស្ថិតនៅសាលប្រជុំសាលាស្រុកកំពង់រោទិ៍ ។
អញ្ជើញចូលរួមក្នុងកិច្ចប្រជុំនេះមាន លោក លោកស្រី នាយករងរដ្ឋបាលសាលាស្រុក លោក លោកស្រីប្រធាន
ការិយាយល័យ អង្គភាព មន្រ្តីរាជការសាលាស្រុក លោកអធិការរងនគរបាលចរាចរណ៍ផ្លូវគោក នៃអធិការដ្ឋាននគរបាលស្រុក លោក លោកស្រីមេឃុំ មន្រ្តីរាជការពាក់ព័ន្ធសរុបវត្តមានចំនួន ២២នាក់ ។
សូមជម្រាបជូនថា គណៈកម្មាធិការជាតិសុវត្ថិភាពចរាចរណ៍ផ្លូវគោកបានចេញសេចក្តីជូនដំណឹងនាពេលកន្លងមកបញ្ជាក់ថា ចាប់ពីថ្ងៃទី០១ ខែឧសភា ឆ្នាំ២០២០ ខាងមុខ នេះតទៅ កងកម្លាំងនគរបាលចរាចរណ៍ផ្លូវគោក និងអនុវត្តការពិន័យអន្តរការណ៍ចំពោះអំពើរល្មើសច្បាប់ នឹងច្បាប់ស្តីពីចរាចរណ៍ផ្លូវគោកតាមអនុក្រឹត្យលេខ៣៩ អនក្រ.បក ចុះថ្ងៃទី២១ ខែមីនា ឆ្នាំ២០១៧ ស្តីពីការពិន័យអន្តរការណ៍ចំពោះអំពើរល្មើសនឹងច្បាប់ស្តីពីចរាចរណ៍ផ្លូវគោក ដែលបានតម្លើង កម្រិតទឹកប្រាក់ពិន័យក្នុងចំនួនពី ៣ (បី)ទៅ៥ ប្រាំដង ធៀបនឹងច្បាប់ចរាចរណ៍ផ្លូវគោកចាស់៕
