ខេត្តស្វាយរៀង ៖ មានករណីគ្រោះថ្នាក់ចរាចរណ៍ដ៏រន្ធត់ បង្កដោយរថយន្តដឹកកម្មកររោងចក្រ បើកបុកម៉ូតូពីក្រោយ ដែលបើកបរដោយលោកតាម្នាក់ រួមដំណើរជាមួយចៅពីរនាក់ បណ្តាលឲ្យក្មេងប្រុសស្រី២នាក់ ស្លាប់ភ្លាមៗ នៅកន្លែងកើតហេតុ ខណៈធ្វើដំណើរចូលរួមមង្គលការបងប្អូន នៅស្រុកស្វាយជ្រំ ខេត្តស្វាយរៀង។
ករណីនេះកើតកាលពីវេលាម៉ោង៥ និង៤៥ល្ងាច ថ្ងៃទី៣០ ខែមេសា ឆ្នាំ២០២០ ក្នុងទិសដៅស្របទិសគ្នា នៅចំណុចលើស្ពានហាយវ៉េ តាមបណ្តោយផ្លូវជាតិលេខ០១ Kmលេខ១២៥-១២៦ ស្ថិតក្នុងភូមិសាលាស្រុកចាស់ សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង។
នគរបាលក្រុងស្វាយរៀង បានឲ្យដឹងថា គ្រោះថ្នាក់ចរាចរណ៍ខាងលើ បង្កឡើងដោយរថយន្ដមិនស្គាល់ម៉ាក បើកបររថយន្ដជែងទាក់ដៃចង្កូត បុកពីក្រោយម៉ូតូម៉ាក Let’s ពណ៌ស លាយខៀវ ពាក់ស្លាកលេខ ស្វាយរៀង 1N-6468 បើកបរដោយឈ្មោះ ប្រាក់ សុគន្ធាវី ភេទប្រុស អាយុ៥០ឆ្នាំ មុខរបរកសិករ រស់នៅភូមិក្រោលគោ ឃុំក្រោលគោ ស្រុកស្វាយជ្រំ ខេត្តស្វាយរៀង ពីកើតទៅលិច ពាក់មួកសុវត្ថិភាព អ្នកបើកបរគ្មានរបួស ម៉ូតូខូចខាតស្រាល ចំណែកអ្នករួមដំណើរដែលត្រូវជាចៅមានL៖ ទី១-ឈ្មោះ វ៉ា ភេទស្រី អាយុ៧ឆ្នាំ មុខរបរសិស្ស រស់នៅភូមិស្វាយចេក ឃុំសំឡី ស្រុកកំពង់រោទិ៍ ខេត្តស្វាយរៀង ពាក់មួកសុវត្ថិភាព (ស្លាប់នៅកន្លែងកើតហេតុ)។ ទី២-ឈ្មោះ យ៉ា អាយុ១០ឆ្នាំ មុខរបរសិស្ស រស់នៅភូមិឃុំជាមួយគ្នា (ស្លាប់នៅកន្លែងកើតហេតុ)។
ប្រភពដដែល បន្តថា ក្រោយពីកើតហេតុ រថយន្តបង្កបានបើកគេចខ្លួនបាត់ សមត្ថកិច្ចកំពុងស្រាវជ្រាវ ចំណែកឯមធ្យោបាយរក្សាទុក នៅការិយាល័យចរាចរណ៍ខេត្តស្វាយរៀង។
បច្ចុប្បន្ន សាកសពត្រូវបានប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី៕
