បាត់ដំបង៖នៅវេលាម៉ោង៣និង៤០នាទីល្ងាចថ្ងៃទី៤ ខែឧសភា ឆ្នាំ២០២០ ក្រុមអ្នកញៀនល្បែងសុីសង អាប៉ោង បៀ ចំនួន៦នាក់ត្រូវកម្លាំងនគរបាលក្រុងបាត់ដំបងចាប់ខ្លួននៅចំណុចក្រុមទី១៤ ភូមិតាព្រួច ឃុំក្តុលដូនទាវ ក្រុងបាត់ដំបង។
ជាទៅក្រុមអ្នកលេងល្បែងទាំងអស់នេះតែងតែប្រមូលម្តុំ ជុំជើងគ្នារៀងរាល់រសៀលបើកលេងរាល់ថ្ងៃដោយគេអះអាងថាគ្មានសមត្ថកិច្ចណាហ៊ានមកចាប់ពួកគេឡើយ។
ផ្ទុយទៅវិញដោយមានការបញ្ជាផ្ទាល់ពីលោកឧត្តមសេនីយ៍ទោ អ៊ុច សុខុន ស្នងការនគរបាលខេត្តបាត់ដំបង និងលោកឧត្តមសេនីយត្រីជេតវណ្ណនី ស្នងការរងផែនព្រហ្មទណ្ឌកំរិតស្រាលទើបលោកឆាង វណ្ណឆៃ ដឹកនាំកម្លាំងចុះទៅបង្ក្រាបនិងឃាត់ខ្លួនយកទៅឃុំបណ្តោះអាសន្ន អោយមូសខាំនៅក្នុងអធិការដ្ឋាននគរបាលក្រុងបាត់ដំបង១យប់ហើយ។
ស្តេចកំពូលល្បែងទាំង៦នាក់នោះឈ្មោះ៖១-គឹម សុខជា ភេទប្រុស អាយុ៤៩ឆ្នាំ ២-ពូ មាច ភេទប្រុស អាយុ៥២ឆ្នាំ ៣-ម៉ៅ រួប ភេទប្រុស អាយុ៥២ឆ្នាំ ៤-ម៉ែន ងិ ភេទប្រុស អាយុ៥៤ឆ្នាំ ៥-ម៉េត រដ្ឋា ភេទប្រុស អាយុ៥៤ឆ្នាំ ៦-យ៉ាត យឿង ភេទប្រុស អាយុ៦៩ឆ្នាំ។
វត្ថុតាងដែលសមត្ថកិច្ចដកហូតបានរួមមាន៖មេអាប៉ោងចំនួន៣ ចានបាញ់អាប៉ោង១ ផ្តិលគ្របអាប៉ោង១ លុយដុល្លារ ចំនួន៣០០ លុយខ្មែរចំនួន៨០មុឺនរៀល និងសម្ភារៈមួយចំនួនទៀត។
លោកឆាង វណ្ណឆៃ អធិការក្រុងបាត់ដំបងបានបញ្ជាក់ប្រាប់ថា៖ជនសង្ស័យទាំង៦នាក់ខាងលើលោកនឹងបញ្ជូនទៅការិល័យព្រហ្មទណ្ឌកំរិតស្រាលខេត្តបាត់ដំបងដើម្បីចាត់ការបន្ត៕
