ខេត្តស្វាយរៀង៖ រណ្តៅដីដូចរន្តបាយខុំ ត្រូវបានឈ្មួញជីកយកអាចម៍ដីលក់ជ្រៅដល់ក្បាលប្រែត្រធ្វើឲ្យប្រជាពលរដ្ឋមានការព្រួយបារម្ភយ៉ាងខ្លាំងអំពីសុវត្ថិភាពកូនចៅនិងគោក្របីធ្លាក់ចូលក្នុងរណ្តៅដីមរណៈនៅរដូវវស្សា ហើយក្នុងមួយខែមកនេះក្រុមរថយន្តដឹកដីទាំងនោះកំពុងបើកបរធ្វើឲ្យធូលីដីហុយទៅលើផ្ទះរបស់ប្រជាពលរដ្ឋរស់នៅតាមដងផ្លូវក្នុងភូមិថ្នាញសង្កាត់បាទីក្រុងបាវិតបង្កឲ្យប៉ះពាល់ដល់សុខមាលភាពប្រជាពលរដ្ឋយ៉ាងខ្លាំង ប្រជាពលរដ្ឋបានអំពាវនាវសុំឲ្យអាជ្ញាធរក្រុង-ខេត្តមេត្តាចុះទៅពិនិត្យដោះស្រាយដោយអនុគ្រោះ។
ប្រជាពលរដ្ឋភូមិថ្នាញ អំពាវនាវនេះកើតឡើងកាលពីវេលាម៉ោង៤រសៀល ថ្ងៃទី១៦ ខែឧសភា ឆ្នាំ២០២០ នៅភូមិថ្នាញ សង្កាត់បាទី ក្រុងបាវិត ខេត្តស្វាយរៀង បើតាមសមត្ថកិច្ចបានឲ្យភ្នាក់ងារសារព័ត៌មានដឹងថា ក្រុមហ៊ុនអាជីវកម្មជីករណ្តៅដីយកអាចម៍ដីលក់នេះឈ្មោះ សុខ ហេង ក្រុមហ៊ុនសុខហេង បានមកធ្វើអាជីវកម្មជីករណ្តៅដី យកអាចម៍ដីលក់នេះរយៈពេលជិត១ខែមកហើយ និងបង្កឲ្យមានធូលីដីហុយទៅលើលំនៅឋានរបស់ប្រជាពលរដ្ឋបង្កឲ្យមានផលប៉ះពាល់ដល់សុខភាពរបស់ប្រជាពលរដ្ឋយ៉ាងខ្លាំងហើយចំពោះរណ្តៅដីដែលក្រុមហ៊ុនសុខហេងកំពុងជីកយកអាចម៍ដីលក់នោះគឺមានជម្រៅប្រមាណជាង១០ម៉ែត្រទៅហើយប្រជាពលរដ្ឋមានការព្រួយបារម្ភខ្លាចបាក់ដីស្រែរបស់ពួកគាត់ដែលនៅជិតរណ្តៅដីពិសេសនៅរដូវវស្សាខ្លាចគោក្របីធ្លាក់លង់ងាប់ឬក្មេងធ្លាក់លង់ស្លាប់ដោយរណ្តៅដីនៅក្នុងភូមិថ្នាញនេះ ជីកក្បែរគ្នាបួនប្រាំរណ្តៅដីហើយសុទ្ធតែមានជម្រៅជ្រៅជាង១០ម៉ែត្រសូមមន្ត្រីជំនាញមន្ទីររ៉ែនិងថាមពលខេត្តមេត្តាចុះមកពិនិត្យមើលផងទាន។
ទាក់ទិនករណីនេះដែរ លោក ប៉ាត់ សាក់ ប្រធានការិយាល័យធនធានរ៉ែ នៃមន្ទីររ៉ែនិងថាមពលខេត្តស្វាយរៀង បានឆ្លើយប្រាប់ភ្នាក់ងារសារព័ត៌មានតាមទូរសព្ទ័ នៅព្រឹកថ្ងៃទី១៧ ឧសភានេះថា គេមានអាជ្ញាបណ្ណ័ និងមានច្បាប់ទើបគេហ៊ានជីកតាមអាជ្ញាបណ្ណ័របស់គេ បើអ្នកសារព័ត៌មានចង់ដឹងទៅសួរម្ចាស់ធ្វើអាជីវកម្មនោះទៅ។
ចំណែកលោក ប៉ុក តក ប្រធានមន្ទីររ៉ែនិងថាមពលខេត្តស្វាយរៀង បានមានប្រសាសន៍ថា ចំពោះក្រុមហ៊ុនសុខហេងនេះ លោកមិនបានដឹងទេ ហើយក៏មិនដឹងថា គេសុំច្បាប់ថ្នាក់ខេត្តឬថ្នាក់ក្រសួង ក៏មិនដឹងដែរម្យាងតាំងពីមានករណីកូវីដ-១៩មកលោកមិនដែលបានចុះមូលដ្ឋានមើលរណ្តៅដីទេ ជាប់រវ់ការងារពង្រឹងផ្សព្វផ្សាយកូវីដ-១៩។
លោក ប៉ុក តក បន្តទៀតថា បើក្រុមអាជីវកម្មសុំច្បាប់តាមរយៈមន្ទីររ៉ែនិងថាមពលខេត្តមន្ទីរអនុញ្ញាតិឲ្យជីកជម្រៅ៤ម៉ែត្រទៅ៤ម៉ែត្រកន្លះប៉ុណ្ណោះ បើសុំថ្នាក់ខេត្តអនុញ្ញាតិត្រឹម៤ម៉ែត្រកន្លះទៅ៥ម៉ែត្រតាមស្ថានភាពដី ហើយបើចាប់ពី១ហិកតាឡើងទៅត្រូវទៅសុំច្បាប់ដល់ក្រសួងរ៉ែនិងឋាមពលអនុញ្ញាតិចាប់ពី៥ម៉ែត្រទៅដល់១០ម៉ែត្រតាមស្ថានភាពដីជាក់ស្តែង។
ទាក់ទិនករណីនេះដែរលោកហែម ពិសិដ្ឋ អភិបាលរងខេត្តស្វាយរៀងបានមានប្រសាសន៍ថា លោកអគុណដល់អ្នកយកព័ត៌មានបានផ្តល់ព័ត៌មានជូនដំណឹងអោយលោកបានជ្រាបលោកនិងចាត់ឲ្យលោកអភិបាលក្រុងបាវិតនិងលោកប្រធានមន្ទីររ៉ែនិងថាមពលខេត្តចុះទៅពិនិត្យស្រាវជ្រាវនិងដោះស្រាយ។
មហាជនកំពុងរង់ចាំមើលចំណាត់ការរបស់អាជ្ញាធរខេត្តហើយក៏បានសំណូមពរដល់លោករដ្ឋមន្ត្រីក្រសួងរ៉ែនិងឋាមពលមេត្តាចុះមកពិនិត្យនិងធ្វើអធិការកិច្ចរណ្តៅដីដែលឈ្មួញជីកយកអាចម៍ដីលក់ជម្រៅជ្រៅដល់ក្បាលប្រែត្រនៅខេត្តស្វាយរៀងជាពិសេសនៅក្រុងបាវិត ដោយកន្លងមកមានទាំងក្រុមអាជីវកម្មមានច្បាប់និងអត់ច្បាប់ធ្វើអាជីវកម្មគ្រប់ស្រុកក្រុងគួរឲ្យព្រួយបារម្ភៈដោយជីករណ្តៅដីជ្រៅចាប់៧ម៉ែត្រទៅជាង១០ម៉ែត្ររាប់សិបរណ្តៅសូមក្រសួងចុះមើលផងទាន ៕
