ក្រុងប៉ោយប៉ែត ៖ នៅព្រឹកថ្ងៃអង្គារ ១៣រោច ខែពិសាខ ឆ្នាំជូត ទោស័ក ព.ស.២៥៦៤ ត្រូវនឹង ថ្ងៃទី១៩ ខែឧសភា ឆ្នាំ២០២០នេះ ក្រោមការដឹកនាំ និងមានការចង្អុលបង្ហាញ ពី លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត អំពីបញ្ហា ស្តាប្រព័ន្ធលូក្នុងក្រុងឡើងវិញ លោក ភោគ លន ចៅសង្កាត់ប៉ោយប៉ែត អមដំណើរ ដោយ លោក វ៉ា ជឹមណារ៉េត ចៅសង្កាត់រងទី១នៃសង្កាត់ប៉ោយប៉ែត និងលោក ប៊ុន សុវុទ្ធា សមាជិកក្រុមប្រឹក្សាសង្កាត់ប៉ោយប៉ែត រួមដំណើរដោយ ក្រុមការងារភូមិបាលិលេយ្យ២ ព្រមទាំងកម្លាំងប្រជាការពារភូមិ បានដឹកនាំក្រុមការងារ អភិវឌ្ឍន៍ សង្កាត់ប៉ោយប៉ែត ចុះស្តាប្រព័ន្ធលូ និង ដឺហ្គែលូបង្ហូរ ទឹកចំនួន ២៦ដឺហ្គែ ដើម្បីត្រៀមទទួលចរន្តទឹកភ្លៀងនារដូវវស្សា ពោលគឺបញ្ចៀសការជន់លិច នៃទីប្រជុំជន
នៅក្នុងឱកាសនោះផងដែរ លោក វ៉ា ជឹមណារ៉េត ចៅសង្កាត់រងទី១ នៃសង្កាត់ប៉ោយប៉ែត បានថ្លែងប្រាប់ឱ្យដឹងថា សកម្មភាពស្តាប្រព័ន្ធលូនេះធ្វើឡើងបន្ទាប់ពីលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានណែនាំឱ្យស្តាលូនេះសម្រាប់ទទួលទឹកពីក្នុងក្រុងប៉ោយប៉ែតហូរចូលមកប្រព័ន្ធលូហូរទៅអូរព្រំដែន ដើម្បី រំដោះទឹកដែលធ្លាប់តែភ្លៀងមកមានការជន់លិចក្នុងក្រុងប៉ោយប៉ែត ។
សូមជម្រាបថា ក្នុងការចំណាយថវិការ សម្រាប់ ចុះស្តាប្រព័ន្ធលូ និងដឺហ្គែលូបង្ហូរទឹកនេះ គឺបានការឧបត្ថម្ភរួមមាន ៖
១ • លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ឧបត្ថម្ភថវិកាចំនួន ៣,៩០០,០០ (បីលានប្រាំបួនសែន) រៀល។
និង ថ្លៃបាយ ទឹក ចំណាយផ្សេងៗ គឺបានការចូលរួមឧបត្ថម្ភ រួមមាន ៖
១ • លោក លោក ភោគ លន ចៅសង្កាត់ប៉ោយប៉ែត
២ • លោក វ៉ា ជឹមណារ៉េត ចៅសង្កាត់រងទី១នៃសង្កាត់ប៉ោយប៉ែត
៣ • លោក ប៊ុន សុវុទ្ធា សមាជិកក្រុមប្រឹក្សាសង្កាត់ នៃសង្កាត់ប៉ោយប៉ែត ។ ដោយ លោកចាន់ពុធ
