ខេត្តកំពង់ធំ ៖ គ្រឿងក្នុងសត្វគោចំនួន ១៦កេសស្នា ស្មើនឹងទម្ងន់ជិត ០១តោន ត្រូវបានសមត្ថកិច្ចខេត្តកំពង់ធំបង្ក្រាបរឹបអូស ខណៈជនល្មើសលួចបន្លំដឹកតាមរថយន្ត ០១គ្រឿងដោយគ្មានច្បាប់អនុញ្ញាត។
សមត្ថកិច្ច បានឲ្យដឹងថា ប្រតិបត្តិការខាងលើ ធ្វើឡើងកាលពីថ្ងៃទី១៩ ខែឧសភា ឆ្នាំ២០២០ វេលាម៉ោង ២១:៤០នាទី ស្ថិតនៅភូមិកកោះ ស្រុកសន្ទុក ខេត្តកំពង់ធំ ក្រោមការដឹកនាំបញ្ជាផ្ទាល់ ពីលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ និងដោយមានការសម្របសម្រួលនីតិវិធីពីលោក សាយ វាសនា ព្រះរាជអាជ្ញារងអមសាលាដំបូងខេត្តកំពង់ធំ កម្លាំងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកំពង់ធំ សហការជាមួយមន្ត្រីជំនាញ នៃមន្ទីរកសិកម្មខេត្តកំពង់ធំ បង្ក្រាបករណី ដឹកជញ្ជូនផលិតផល មានដើមកំណើតពីសត្វ គ្មានលិខិតអនុញ្ញាត។
វត្ថុតាង សមត្ថកិច្ចដកហូតបាន រួមមាន ៖ រថយន្តសាំងយ៉ុង ០១គ្រឿង ពណ៌ស ពាក់ស្លាកលេខ ភ្នំពេញ 2AN-1029 ដឹកជញ្ផូនផលិតផលមានដើមកំណើតពីសត្វ គ្មានលិខិតអនុញ្ញាត (គ្រឿងក្នុងសត្វគោ ចំនួន ១៦កេសស្នោ ស្មើនឹងចំនួន ៩២៨គីឡូក្រាម។
ករណីខាងលើនេះ សមត្ថកិច្ច នៃស្នងការដ្ឋាននគរបាលខេត្តកំពង់ធំ បានប្រគល់វត្ថុតាង ជូនមន្ត្រីជំនាញ នៃមន្ទីរកសិកម្មខេត្តកំពង់ធំ ដើម្បីចាត់ការតាមនីតិវិធី ៕
