ភ្នំពេញ ៖ ដើម្បីអនុវត្តន៍ច្បាប់ចរាចរណ៍ ឱ្យកាន់តែប្រសិទ្ធភាពនោះ កម្លាំងនគរបាលខណ្ឌសែនសុខ កំពុងបន្តចុះចាប់ចាក់សោរកង់រថយន្តដែលម្ចាស់បើកមកចតនៅលើចិញ្ចើមផ្លូវគ្មានរបៀបរៀបរយ នឹងប៉ះពាល់ដល់សណ្តាប់ធ្នាប់សារធាណៈ។ ជាក់ស្តែង នៅព្រឹកថ្ងៃទី២១ ខែឧសភា ឆ្នាំ២០២០នេះ កម្លាំងសមត្ថកិច្ចនគរបាលផ្នែកចរាចរណខណ្ឌសែនសុខ ក្រោមការដឹកនាំរបស់លោក ម៉ូវ ម៉ានិត អភិបាល នៃគណៈអភិបាលខណ្ឌសែនសុខ ជាប្រធានគណៈបញ្ជាការឯកភាពខណ្ឌ លោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌ បានបញ្ជាឲ្យមន្ត្រីរបស់លោក បន្តចុះអនុវត្តន៍ច្បាប់ចរាចរណ៍ ចំពោះម្ចាស់រថយន្តទាំងឡាយណា ដែលបើកមកឈប់ចតនៅតាមចិញ្ចើមផ្លូវសារធារណៈដែលធ្វើឲ្យបាត់បង់សណ្តាប់ធ្នាប់តាមដងផ្លូវស្ទះចរាចរណ៍ និងអាចបង្កប៉ះពាល់ដល់អ្នកធ្វើដំណើរទៀតផង។
យោងតាមរបាយការរបស់សមត្ថកិច្ច បានឲ្យដឹងថា ការចុះរៀបចំសណ្តាប់ធ្នាប់នេះ តាមបណ្តោយផ្លូវភ្នំពេញ-ហាណូយ ស្ថិតក្នុងសង្កាត់ឃ្មួញ ខណ្ឌសែនសុខ។
លោកវរសេនីយ៍ត្រី ស៊ីន សុវណ្ណ នាយផ្នែកនគរបាលចរាចរខណ្ឌសែនសុខ បានឲ្យដឹងថា ដោយមានការបញ្ជាផ្ទាល់ពីលោកអភិបាល និងលោកអធិការ និងលោកអធិការរងទទួលផែនខណ្ឌសែនសុខ បានឲ្យលោកដឹកនាំកម្លាំងចុះធ្វើការចាប់រថយន្តទាំងឡាយណា ដែលចតនៅតាមចិញ្ចើមផ្លូវសាធារណៈជាប្រចាំក្នុងមូលដ្ឋាន។
ហើយរថយន្តដែលកម្លាំងយើងចាក់សោរនោះ គិតត្រឹមម្សិលមិញ រហូតមកព្រឹកថ្ងៃទី២១នេះ បានចាក់សោររថយន្តបានសរុប ចំនួន១៤គ្រឿង និងបានធ្វើការអប់រំណែនាំដល់ម្ចាស់រថយន្តធ្វើការផាកពិន័យតាមច្បាប់៕
