កណ្តាល ៖ បុរសកម្មករម្នាក់ជិះម៉ូតូលឿនពេកបណ្តាលឲ្យដួលផ្ទប់ទៅនឹងថ្នល់រងរបួសធ្ងន់ហើយព្យាយាមប្រឹងងើបស្រាប់តែមានរថយន្តមួយគ្រឿងមកបុកពេញមួយទំហឹងបណ្ដាលឲ្យស្លាប់នៅនឹងកន្លែង។
ហេតុការណ៍នេះបានកើតឡើងកាលពីវេលាម៉ោង១៩ និង៥៣នាទីយប់ថ្ងៃទី២២ ខែឧសភា ឆ្នាំ២០២០នៅលើផ្លូវជាតិលេខ១ គីឡូម៉ែត្រលេខ៤២-៤៣ចំណុចភូមិស្ទឹង ឃុំសំរោងធំ ស្រុកកៀនស្វាយ ខេត្តកណ្តាល។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានដឹងថា មុនពេលកើតហេតុគេឃើញម៉ូតូមួយគ្រឿងម៉ាកសង់ឌ្រីមពណ៌ខ្មៅ ពាក់ស្លាកលេខភ្នំពេញ1GA-9179 បើកបរដោយ ឈ្មោះ ហាន ម៉ាប់ ភេទប្រុស អាយុ៣០ឆ្នាំ ជនជាតិខ្មែរ មានមុខរបរកម្មកររោងចក្រជីផ្កាយប្រាំ មានទីលំនៅភូមិស្ទឹង ឃុំសំរោងធំ ស្រុកកៀនស្វាយ ខេត្តកណ្តាលបើកបរក្នុងល្បឿនលឿនលុះមកដល់ចំណុចកើតហេតុខាងលើជនរងគ្រោះក៏ដួលម៉ូតូខ្លួនឯងផ្ទប់ទៅនឹងថ្នល់រងរបួសធ្ងន់ភ្លាមនោះជនរងគ្រោះបានព្យាយាមប្រឹងងើបតែជាអកុសលស្រាប់តែមានរថយន្តមួយគ្រឿងទៀតម៉ាកLEXUS 470 ពណ៌ ស ពាក់ស្លាកលេខភ្នំពេញ 2K-7768 បើកបរដោយជនមិនស្គាល់អត្តសញ្ញាណដែលបើកទិសដៅពីអ្នកលឿងទៅភ្នំពេញបានបុកម៉ូតូពេញមួយទំហឹងបណ្តាយឲ្យស្លាប់នៅនឹងកន្លែងកើតហេតុ។
ប្រភពពីសមត្ថកិច្ចបានឲ្យដឹងថា ពេលទទួលបានព័ត៌មានភ្លាមកម្លាំងប៉ុស្តិ៍សហការណ៍ជាមួយកម្លាំងជំនាញបានដេញ តាមឃាត់រថយន្តបង្កបាននៅចំណុចភូមិគគីរ ឃុំគគីរ ស្រុកកៀនស្វាយ ចំណែកអ្នកបើបានរត់គេចខ្លួនមុនសមត្ថកិច្ចទៅដល់។
ក្រោយកើតហេតុសមត្ថកិច្ចជំនាញក៏បានធ្វើការវាស់វែងយកម៉ូតូ និងរថយន្តទៅរក្សាទុកនៅអធិការដ្ឋាននគរបាលស្រុកកៀនស្វាយរង់ចាំម្ចាស់មកចូលខ្លួនដោះស្រាយគ្នានៅពេលក្រោយ។ រីឯសាកសពត្រូវបានសមត្ថកិច្ចធ្វើកំណត់ហេតុប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕
