បន្ទាយមានជ័យ៖ពិធីចែកអំណោយមនុស្សធម៌ដល់ប្រជាពលរដ្ឋមានជីវភាពខ្វះខាតចំនួន ១០១គ្រួសារនេះ បានធ្វើឡើងនៅព្រឹកថ្ងៃអាទិត្យ ៣ កើត ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៤ ខែឧសភា ឆ្នាំ២០២០ នៅសាលាឆាន់ក្នុងវត្តសុវណ្ណរុក្ខាសុរិយារាម ហៅវត្តព្រៃគប់ ស្ថិតក្នុងភូមិព្រៃគប់ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។
លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានថ្លែងក្នុងសន្ទរកថាបើកពិធីនេះថា ថ្ងៃនេះគឺថ្ងៃដ៏វិសេសវិសាលដែលរដ្ឋបាលក្រុងប៉ោយប៉ែតសហការជាមួយសប្បុរសជនបានរៀបចំពិធីចែកអំណោយជូនដល់បងប្អូនប្រជាពលរដ្ឋមានជីវភាពខ្វះខាត សរុបចំនួន ១០១គ្រួសាររស់នៅភូមិព្រៃគប់ សង្កាត់ផ្សារកណ្ដាល ក្រុងប៉ោយប៉ែត នាពេលនេះ។
ក្នុងនាមក្រុមប្រឹក្សាក្រុង គណៈអភិបាលក្រុង និងក្នុងនាមរូបខ្ញុំផ្ទាល់ ខ្ញុំសូមថ្លែងអំណរគុណដល់ព្រះតេជគុណព្រះគ្រូចៅអធិការ ព្រះគុណម្ចាស់គ្រប់ព្រះអង្គ និងសប្បុរសជនដែលបានរៀបចំពិធីនេះឡើង និងសូមថ្លែងអំណរគុណដល់ លោក លោកស្រីមន្ត្រីរាជការ សប្បុរសជន ភ្ញៀវកិត្តិយស និងសមាជិក សមាជិកាទាំងអស់ ដែលបានលះបង់ពេលវេលាដ៏មានតម្លៃអញ្ជើញចូលរួមក្នុងពិធីមនុស្សធម៌ដ៏មានសារៈសំខាន់នាឱកាសនេះ។
លោកអភិបាលក្រុងប៉ោយប៉ែត បានមានប្រសាសន៍បន្តថា យោងតាមអនុសាសន៍ណែនាំដ៏ខ្ពង់ខ្ពស់របស់ ឯកឧត្តមនាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារចុះជួយខេត្តបន្ទាយមានជ័យ ឯកឧត្តម នាយឧត្តមសេនីយ៍ ជួន សុវណ្ណ អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារចុះជួយក្រុងប៉ោយប៉ែត ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ រដ្ឋបាលក្រុងក្រោមការដឹកនាំរបស់រូបខ្ញុំបាទ បាននិងកំពុងផ្ដោតការយកចិត្តទុកដាក់លើការងារសំខាន់ៗមួយចំនួនដូចជា ៖ បញ្ហាជំងឺកូវីដ-១៩, ការបិទច្រកព្រំដែន, ហាមការប្រមូលផ្ដុំ, ការបំផុសបំផុលបិទច្រក, ការបំផុសបំផុលផ្ដិតមេដៃយកដី, ការងារសង្គមកិច្ច និងមនុស្សធម៌, ការរៀនតាមប្រព័ន្ធអនឡាញ។ រូបខ្ញុំគិតថា ការចែកអំណោយនាពេលនេះ គឺជាការរួមចំណែកកាត់បន្ថយទុក្ខលំបាករបស់បងប្អូនប្រជាពលរដ្ឋមានជីវភាពខ្វះខាតបានមួយរយៈពេលខ្លីប៉ុណ្ណោះ ចំពោះអំណាចយើងត្រូវចែកជូននាពេលនេះ ក្នុងមួយគ្រួសារទទួលបានអង្ករ ២០គីឡូក្រាម, មី ១០កញ្ចប់, ទឹកស៊ីអ៊ីវ ០១យួរ រួមនឹងថវិកាចំនួន ២០,០០០ (ម្ភៃពាន់) រៀល។
អំណោយដែលយកមកចែកបងប្អូនប្រជាពលរដ្ឋនាពេលនេះទទួលបានការឧបត្ថម្ភពីសប្បុរសជនដូចមានរាយនាមខាងក្រោម ៖
១-រដ្ឋបាលក្រុងប៉ោយប៉េត ឧបត្ថម្ភអង្ករខ្សាយចំនួន ២៥០គីឡូក្រាម
២-លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត និងលោកស្រី វី សាវឿន ជាភរិយា ព្រមទាំងបុត្រា-បុត្រី និងចៅប្រុស-ចៅស្រី ឧបត្ថម្ភគ្រឿងឧបភោគនិងគ្រឿងបរិភោគ ចំនួន ២១គ្រួសារ
៣-លោក តាន់ គឹមរិទ្ធ សមាជិកក្រុមប្រឹក្សាក្រុងប៉ោយប៉ែត និងលោកស្រី យូ គីមហ៊ាង ឧបត្ថម្ភថវិកាមួយចំនួន
៤-លោក ធួក ចាន់ធី និងលោកស្រី មិញ ចាន់ថុល ថវិកាចំនួន 800 USD (ប្រាំបីរយដុល្លារអាមេរិក)
៥-លោក ហ៊ុយ ទូច និងលោកស្រី ហៃ លក្ខិណា ថវិកាចំនួន 450 USD (បួនរយហាសិបដុល្លារអាមេរិក)
៦-ឯកឧត្តម សំ ហ៊ីសេង និងលោកជំទាវ អ៊ឹង តិចហួ ថវិកាចំនួន ១,០០០,០០០ (មួយលាន) រៀល
៧-លោក ទិត សុវណ្ណ និងលោកស្រី ឈុន គឹមឡាំង ថវិកាចំនួន 100USD (មួយរយដុល្លារអាមេរិក)
៨-លោក រស់ សារុំ និងលោកស្រី បាក់ ថេងគៀង ថវិកាចំនួន 100 USD (មួយរយដុល្លារអាមេរិក)
៩-លោក គង់ ប៊ុនឈឿន និងលោកស្រី មិញ កន្ថារី ថវិកាចំនួន 117 USD (មួយរយដប់ប្រាំពីរដុល្លារអាមេរិក)
១០-ឧបាសិកា ស្រៀង គឹមហេង ថវិកាចំនួន 40 USD (សែសិបដុល្លារអាមេរិក)
១១-ឧបាសិកា ម៉ា ស្រីពៅ ថវិកាចំនួន ១០០,០០០ (មួយសែន) រៀល
១២-ព្រះគ្រូឃោសាភិសិរី តែ មាច ព្រះគ្រូចៅអធិការវត្តរតនារាមផ្សារកណ្ដាល បានឧបត្ថម្ភថវិកា និងគ្រឿងឧបភោគនិងគ្រឿងបរិភោគចំនួន ២គ្រួសារ
១៣-លោក ស សុភាព ព្រមទាំងបុត្រ បានឧបត្ថម្ភថវិកា និងគ្រឿងឧបភោគនិងគ្រឿងបរិភោគចំនួន ២គ្រួសារ
១៤-លោក អាំង អេងថុង បានឧបត្ថម្ភថវិកា និងគ្រឿងឧបភោគនិងគ្រឿងបរិភោគចំនួន ១គ្រួសារ
១៥-ឧបាសិកា ជៀវ ងួនហួយ និងស្វាមី បានឧបត្ថម្ភទឹកពិសាដប រួមនឹងមីកញ្ចប់ចំនួន ១០១គ្រួសារ។
ឆ្លៀតក្នុងឱកាសនោះ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត សូមគោរពថ្លែងការកោតសរសើរដោយស្មោះចំពោះព្រះគ្រូចៅអធិការ សែម ប៊ុននី ដែលព្រះអង្គបានរួមចំណែកយ៉ាងធំធេង ក្នុងការកសាងសមិទ្ធផលនានាក្នុងវត្ត និងផ្ដើមគំនិតធ្វើការងារមនុស្សធម៌នាពេលនេះ និងសូមថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ ដែលបានបរិច្ចាគថវិកា និងគ្រឿងឧបភោគនិងគ្រឿងបរិភោគចែកជូនបងប្អូនប្រជាពលរដ្ឋនាឱកាសនេះ។ ជាទីបញ្ចប់ខ្ញុំព្រះករុណាសូមប្រគេនពរដល់ព្រះតេជគុណគ្រប់ព្រះអង្គ និងសូមជូនពរដល់លោក លោកស្រី មន្ត្រីរាជការ សប្បុរសជន និងបងប្អូនប្រជាពលរដ្ឋទាំងអស់ដែលមានវត្តមានក្នុងពិធីនេះ សូមជួបប្រទះនូវពុទ្ធពរទាំងបួនប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕ដោយ៖លោកចាន់ ពុធ
