ព្រៃវែង ៖ កាលពីព្រឹកថ្ងៃអាទិត្យ ៥កើត ខែជេស្ឋ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី២៤ ខែឧសភា ឆ្នាំ២០២០ ឯកឧត្តម ឧកញ៉ា ប៉ែន នួន ប្រធានក្រុមការងារគណបក្សប្រជាជនកម្ពុជា ឃុំកំពង់ប្រាសាទ និងលោកជំទាវ បានអញ្ជើញចុះសាកសួរសុខទុក្ខបងប្អូនប្រជាពលរដ្ឋ នៅក្នុងឃុំកំពង់ប្រាសាទ ស្រុកពាមជរ ខេត្តព្រៃវែង។
នៅក្នុងពិធីខាងលើនេះដែរក៏មានការអញ្ជើញចូលរួមពីលោក ផេង ហ៊ួរ ប្រធានគណៈកម្មាធិការគណបក្សប្រជាជនកម្ពុជា ស្រុកពាមជរ និងលោក ហ៊ុន ចាន់ដែន អភិបាលរងស្រុកពាមជរ និងជាអនុប្រធានក្រុមការងារគណបក្សប្រជាជនកម្ពុជា ឃុំកំពង់ប្រាសាទ និងសមាជិកសមាជិកាបក្ស រួមនឹងបងប្អូនប្រជាពលរដ្ឋជាច្រើនរូបទៀត។
ឯកឧត្តម ឧកញ៉ា ប៉ែន នួន ដែលត្រូវបានតែងតាំង ជាប្រធានក្រុមការងារគណបក្សប្រជាជនកម្ពុជា ឃុំកំពង់ប្រាសាទ មានសេចក្ដីសប្បាយរីករាយ ដែលប្រមុខរាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា និងសម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានក្រុមការងារថ្នាក់ជាតិចុះជួយខេត្តព្រៃវែង ដែលមានជំនឿទុកចិត្ត តែងតាំងលោកជាប្រធានក្រុមការងារ គណបក្សប្រជាជនកម្ពុជា ឃុំកំពង់ប្រាសាទ ហើយលោក បានសន្យា និងប្តេជ្ញាយ៉ាងមុតមាំថា នឹងប្រឹងប្រែងអនុវត្តតួនាទីឲ្យបានល្អ ដើម្បីបម្រើប្រជាជន ជួយដោះស្រាយបញ្ហានានា ដែលកើតមានឡើងចំពោះប្រជាជនក្នុងមូលដ្ឋាន អោយស្របតាមគោលនយោបាយរបស់គណបក្ស គោលបំណងគឺ កាត់បន្ថយភាពក្រីក្រជូនបងប្អូនប្រជាពលរដ្ឋអោយមានភាពល្អប្រសើរ។
បងប្អូនប្រជាពលរដ្ឋដែលបានចូលរួមក្នុងពិធីខាងលើក៏បានអបអរសាទរ ដល់ ឯកឧត្តម ឧកញ៉ា ប៉ែន នួន ហើយពួកគាត់មានសង្ឃឹម និងជឿជាក់ថា ឯកឧត្តម ឧកញ៉ា នឹងកែប្រែជីវភាពរបស់ពលរដ្ឋក្នុងឃុំកំពង់ប្រាសាទ និងបង្កើតសមទ្ធផលផ្សេងៗទៀតដើម្បីលើកមុខមាត់របស់ឃុំផងដែរ។
គួរបញ្ជាក់ផងដែរថា ឯកឧត្តម ឧកញ៉ា ប៉ែន នួន ត្រូវបានតែងតាំងជាប្រធានក្រុមការងារគណបក្សប្រជាជនកម្ពុជា ឃុំកំពង់ប្រាសាទ កាលពីថ្ងៃសៅរ៍ ១០រោច ខែពិសាខ ឆ្នាំជូត ទោស័ក ពុទ្ធសករាជ២៥៦៤ ត្រូវនឹងថ្ងៃទី១៦ ខែឧសភា ឆ្នាំ២០២០កន្លងទៅនេះ នៅទីស្នាក់ការគណបក្សប្រជាជនកម្ពុជា ស្រុកពាមជរ ខេត្តព្រៃវែង ក្រោមអធិបតីភាព ឯកឧត្តម ស្បោង សារ៉ាត់ ប្រធានគណៈកម្មាធិការបក្ស ខេត្តព្រៃវែង ឯកឧត្តម យុទ្ធ ភូថង ប្រធានក្រុមការងារគណបក្សប្រជាជនកម្ពុជា ចុះជួយស្រុកពាមជរ រួមនឹងសមាជិកសមាជិកាបក្សស្រុកជាច្រើនរូបទៀត៕
