កំពង់ស្ពឺ៖គ្រោះថ្នាក់ចរាចរណ៍មួយបានកើតឡើងដោយរថយន្តបុកក្មេងស្រីអាយុ៧ឆ្នាំម្នាក់ដែលកំពុងដើរឆ្លងផ្លូវបណ្តាលឲ្យស្លាប់ភ្លាមៗនៅនិងកន្លែង។ហេតុការណ៍នេះកើតឡើងនៅត្រង់ចំណុចភូមិអង្គរខ្ជាយ ឃុំព្រៃវិហារ ស្រុកគងពិសី ខេត្តកំពង់ស្ពឺ កាលពីថ្ងៃទី៦ ខែមិថុនា ឆ្នាំ២០២០។
សមត្ថកិច្ចបានឲ្យដឹងថាមុនពេលកើតហេតុគេឃើញ រថយន្តមួយគ្រឿង ម៉ាក ផេនធ័រពណ៍ខ្មៅ ផ្ទុកទម្ងន់២តោនកន្លះ ពាក់ផ្លាកលេខភ្នំពេញ3A-4728 អ្នកបើកបររថយន្តឈ្មោះ ង៉ែត ថេត ភេទប្រុស អាយុ២៧ឆ្នាំ រស់នៅភូមិដក់ពរ ឃុំបឹងត្រាញ់ខាងត្បូង ស្រុកសំរោងខេត្តតាកែវ និងអ្នករួមដំណើរឈ្មោះ ម៉េង ឈៀង ភេទប្រុស អាយុ២២ឆ្នាំ រស់នៅភូមិព្រៃស្រឡែង ឃុំទួលអំពិលស្រុកបសេដ្ឋខេត្តកំពង់ស្ពឺ បើកបរពីកើតទៅលិច ក្នុងល្បឿនលឿន លុះបើកមកដល់ចំណុចខាងលើ ក៏បានបុកក្មេងស្រីឈ្មោះដឺត ស្រីលាក់ អាយុ៧ឆ្នាំ រស់នៅភូមិឃុំកើតហេតុខាងលើ ដែលកំពុងដើរឆ្លងផ្លូវពីត្បូងទៅជើង បណ្តាលឲ្យស្លាប់ភ្លាមៗនៅនឹងកន្លែងកើតហេតុ។
ប្រភពដដែលបានបន្តថាក្រោយពីកើតហេតុជំនាញបានប្រគល់សពក្មេងស្រីទៅឲ្យអាណាព្យាបាលដើម្បីធ្វើបុណ្យតាមប្រពៃណី។ចំណែកអ្នកបើករថយន្តបង្ករួមទាំងវត្ថុតាងត្រូវបានសមត្ថកិច្ចឃាត់ទុកនៅអធិការដ្ឋាននគរបាលស្រុកគងពិសីដើម្បីកសាងសំណុំរឿងចាត់ការតាមនីតិវិធី៕
