កំពង់ស្ពឺ៖ សមត្ថកិច្ចជំនាញ នៅព្រឹកថ្ងៃទី១២ ខែមិថុនា ឆ្នាំ២០២០នេះ បានចុះបង្ក្រាបទីតាំងលួចផលិតបារីក្លែងក្លាយមួយកន្លែង របស់ជនជាតិចិន នៅស្រុកភ្នំស្រួច ខេត្តកំពង់ស្ពឺ និងដកហូតបារីជាង១,០០០ប៊ិច និងម៉ាស៊ីនផលិត២គ្រឿង។
ប្រភពព័ត៍មាន បានឱ្យដឹងថា មកទល់ពេលនេះ កម្លាំងជំនាញសហការជាមួយអយ្យការ គណៈកម្មាធិការកំពុងតែស្រាវជ្រាវ និងសាកសួរករណីនេះយ៉ាងល្អិតល្អន់ ហើយនឹងចេញលទ្ធផលក្នុងពេលឆាប់ៗខាងមុខ។
លោក សរ សុពុត្រា អភិបាលរងខេត្តកំពង់ស្ពឺ បានឲ្យដឹងថា នារសៀលថ្ងៃទី១១ ខែមិថុនា ឆ្នាំ២០២០ ក្នុងនាមតំណាងអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកំពង់ស្ពឺ បានដឹកនាំកម្លាំងចម្រុះ នៃគណៈបញ្ជាការឯកភាពរដ្ឋបាលខេត្ត សហការជាមួយគណៈកម្មាធិការប្រយុទ្ធប្រឆាំងផលិតផលក្លែងក្លាយ ក្រសួងមហាផ្ទៃ ដែលដឹកនាំដោយលោកឧត្តមសេនីយ៍ទោ ជ័យ រិទ្ធី អនុប្រធានលេខាធិការដ្ឋានក្រោមការសម្របសម្រួលនីតិវិធីដោយអយ្យការអមសាលាដំបូងខេត្ត បានចុះឆែកឆេរទីតាំងផលិតបារីក្លែងក្លាយ មួយកន្លែងស្ថិតក្នុងភូមិចេក ឃុំអូរ ស្រុកភ្នំស្រួច។
បច្ចុប្បន្ន សមត្ថកិច្ចជំនាញ បានកសាងសំណុំរឿងបញ្ជូនទៅសាលាដំបូងខេត្ត ដើម្បីអនុវត្តទៅតាមនីតិវិធីច្បាប់៕
