តាកែវ៖នៅព្រឹកថ្ងៃចន្ទ ១០រោច ខែជេស្ឋ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី១៥ ខែមិថុនា ឆ្នាំ២០២០លោកណែម ហាក់ ជំទប់ទី១ឃុំ រួមជាមួយលោក សុិន សារ៉ាត់ លោក ទូច បុល សមាជិកក្រុមប្រឹក្សាឃុំ និងលោក មុី ឆុំ មេភូមិត្រពាំងថ្ម( ត្រូវជាឪពុករបស់លោកឧត្តមសេនីយ៍ត្រី ដាំ ឈឿន )បាននាំយករទេះរុញចំនួន ៤គ្រឿងដែលជាអំណោយដ៏ថ្លៃថ្លារបស់លោកឧត្តមសេនីយ៍ត្រី ដាំ ឈឿន ជានាយករងមន្ទីរប្រឆាំងបទល្មើសគ្រឿងញៀននៃអគ្គស្នងការដ្ឋាននគរបាលជាតិ ក្រសួងមហាផ្ទៃទៅប្រគល់ជូនលោកយាយ ក៏ដូចជាអ៊ុំប្រុស អ៊ុំស្រី និងក្មួយស្រីដែលជាជនពិការ និងអ្នកមានជម្ងឺមិនអាចដើរបានដោយខ្លួនឯងស្ថិតនៅភូមិត្រពាំងថ្ម ឃុំគុស ស្រុកត្រាំកក់ ខេត្តតាកែវ ។
អ្នកដែលមានជម្ងឺមិនអាចដើរបានដោយខ្លួនឯងមានឈ្មោះដូចខាងក្រោម ៖១ – លោកយាយ សុឹម ឡោម អាយុ ៨១ឆ្នាំនៅភូមិត្រពាំងលាន(ចាស់ជរា)
២ – ប្អូនស្រី ហ៊ុន ស្រីតន អាយុ ១៤ឆ្នាំនៅភូមិត្រពាំងតាសុខ ( ពិការពីកំណើត )
៣ – អ៊ុំស្រី បូ រ៉ែម អាយុ ៧២ឆ្នាំនៅភូមិតាលាក់ខាងត្បូង (ពិការដោយសារគ្រោះថ្នាក់ចរាចរ )
៤ – លោកពូ ចាន់ ហេម អាយុ ៥៩ឆ្នាំនៅភូមិត្រពាំងថ្ម (ពិការដោយសារជម្ងឺ )។
ក្រោយពីទទួលបានអំណោយអ្នកទាំងអស់គ្នាមានចិត្តសប្បាយរីករាយ និងបានថ្លែងអំណរគុណ ដល់ឯកឧត្តម ដាំ ឈឿន ដែលលោកជូនដល់ប្រជាពលរដ្ឋ ជួបទុក្ខលំបាក។
ក្នុងឳកាសនោះដែរលោកណែម ហាក់ ជំទប់ទី១ឃុំរួមនឹងក្រុមការងារក៏បាននាំយកនូវការផ្ដាំផ្ញើពីសំណាក់ លោកឧត្តមសេនីយ៍ត្រី ដាំ ឈឿន ដល់លោកយាយពិការ និងអ្នកមានជម្ងឺមិនអាចដើរបាន ក៏ដូចជាប្រជាពលរដ្ឋទាំងអស់សូមចូលរួមទប់ស្កាត់ជំងឺ covid-19 ទាំងអស់គ្នា ដោយការធ្វើអនាម័យ លាងដៃ ឱ្យបានញឹកញាប់ និងធ្វើតាមការណែនាំរបស់ក្រសួងសុខាភិបាល៕
