រាជធានីភ្នំពេញ៖យុវជន០២នាក់បានស្លាប់ភ្លាមនៅនឹងកន្លែងកើតហេតុយ៉ាងអាណោចអាធ័មបន្ទាប់ពីបានជិះម៉ូតូម៉ាកឌ្រីមសង់(HONDA Dream) មួយគ្រឿងជ្រុលទៅបុករថយន្តសណ្តោងដឹកទំនិញធុនធំមួយគ្រឿងដែលចតលើដងផ្លូវពីក្រោយពេញទំហឹងបណ្តាលឲ្យស្លាប់ទាំង០២នាក់។
ហេតុការណ៍នេះបានកើតឡើងកាលពីវេលាម៉ោង១១យប់ថ្ងៃទី២១ខែមិថុនាឆ្នាំ២០២០នៅចំណុចមុខរោងចក្រ៦ជាន់តាមបណ្ដោយផ្លូវវ៉េងស្រេងក្នុងសង្កាត់ចោមចៅទី១ខណ្ឌពោធិ៍សែនជ័យរាជធានីភ្នំពេញ។
ជនរងគ្រោះទាំងពីរមិនទាន់ស្គាល់អត្តសញ្ញាណនៅឡើយទេ។
តាមប្រភពពីកន្លែងកើតហេតុបានឲ្យដឹងថា! មុនកើតហេតុគេឃើញរថយន្តសណ្តោងដឹកទំនិញធុនធំមួយគ្រឿងម៉ាកហីយ៉ាន់ដាយក្បាលពណ៌សពាក់ស្លាកលេខកំពង់ចាម3A-7979បិតស្លាកឡូហ្គោពិមុខ(L-M-H)បានចតលើដងផ្លូវនៅចំណុចកើតហេតុខាងលើក្នុងទិសដៅកើតលិចដោយមិនបានដាក់ស្លាកសញ្ញាសំគាល់ឲ្យបានត្រឹមត្រូវលុះដល់ម៉ោងកើតហេតុខាងលើក៏មានយុវជនពីរនាក់ជិះម៉ូតូមួយគ្រឿងម៉ាកឌ្រីមសង់ពណ៌ខ្មៅស៊េរីឆ្នាំ២០២០ពាក់ស្លាកលេខភ្នំពេញ1ID-3028ធ្វើដំណើរស្របទិសដៅគ្នាពីលិចទៅកើតបានជ្រុលទៅបុកពីក្រោយផ្នែកខាងឆ្វេងពេញទំហឹងបណ្តាលឲ្យជនរងគ្រោះទាំងពីរនាក់បោកផ្ទប់បែកក្បាលធ្លាយខួរស្លាប់នៅនឹងកន្លែងកើតហេតុយ៉ាងអាណោចអាធ័ម។
ក្រោយកើតហេតុសមត្ថកិច្ចមូលដ្ឋានបានចុះមកដល់ទីតាំងកើតហេតុបានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរផ្លូវគោករាជធានីភ្នំពេញដើម្បីធ្វើការដោះស្រាយគ្នាទៅតាមផ្លូវច្បាប់។
ដោយឡែកសពជនរងគ្រោះសមត្ថកិច្ចធ្វើកំណត់ហេតុហរួចដឹកតាមរថយន្ដយកទៅតម្កល់ទុកនៅវត្តទឹកថ្លាដើម្បីធ្វើការស្រាវជ្រាវរកសាច់ញាតិមកទទួលយកទៅធ្វើបុណ្យតាមប្រពៃណី៕
