ខេត្តបាត់ដំបង ៖ កំលាំងផ្នែកប្រឆាំងគ្រឿងញៀនសហការជាមួយកំលាំងក្រុមអន្តរាគមន៍ នៃអធិការដ្ឋាននគរបាលស្រុកបវេល បានចុះប្រតិបត្តិការ បង្ក្រាបបានករណីរក្សាទុកដោយខុសច្បាប់នូវសារធាតុញៀន០១ករណីក្នុងបទល្មើសជាក់ស្តែង ។
លោកវរសេនីយ៍ទោ សុខ និមល នាយការិយាល័យប្រឆាំងគ្រឿងញៀនខេត្តបានអោយដឹងថា នៅក្នុងកិច្ចប្រតិបត្តិការខាងលើនេះធ្វើឡើងនៅវេលាម៉ោង ១១និង០០នាទី ថ្ងៃទី២២ ខែមិថុនា ឆ្នាំ២០២០ នៅចំណុចភូមិសាំងរាំង ឃុំបវេលស្រុកបវេល ខេត្តបាត់ដំបង ។
ជាមួយកិច្ចប្រតិបត្តិការនេះដែរ ក្នុងបទល្មើសជាក់ស្តែងសមត្ថកិច្ចជំនាញបានចាប់ឃាត់ខ្លួនជនសង្ស័យម្នាក់មាន ឈ្មោះ រ៉ា វិឡា ហៅ ប៉ិ ភេទប្រុស អាយុ៣៧ឆ្នាំ មានទីលំនៅភូមិសាំងរាំង ឃុំបវេល ស្រុកបវេល ខេត្តបាត់ដំបង ។
វត្ថុតាងចាប់យកបានរួមមាន៖
-ថ្នាំញៀនប្រភេទមេតំហ្វេតាមីន (ម៉ាទឹកកក ICE) ចំនួន ០៨កូនថង់ ទម្ងន់ ២,៨៧ក្រាម (ទាំងសំបក) -ទូរស័ព្ទដៃចំនួន ០១គ្រឿង (ចាស់) និងថង់សម្រាប់រំលែកច្រកថ្នាំញៀនលក់មួយចំនួន ។
ក្រោយធ្វើការឃាត់ខ្លួនជនសង្ស័យឈ្មោះ រ៉ា វិឡា ហៅ ប៉ិ ខាងលើមានដីកាបង្គាប់ឲ្យចាប់ខ្លួន-ឃុំខ្លួន លេខ ៣៦០ត.ព្រ ចុះថ្ងៃទី១៣ ខែឧសភា ឆ្នាំ២០២០ របស់លោក ជា វណ្ណៈ ចៅក្រមជំនុំជម្រះ នៃសាលាដំបូងខេត្តបាត់ដំបង ពីបទជួញដូរដោយខុសច្បាប់នូវសារធាតុញៀន ប្រព្រឹត្តិនៅចំណុចភូមិដាច់ព្រាត់ ឃុំបវេល ស្រុកបវេល ខេត្តបាត់ដំបង កាលពីថ្ងៃទី០៧ ខែកក្កដា ឆ្នាំ២០១៩ កន្លងទៅ។
រហូតមកដល់ពេលនេះជនល្មើស និងវត្ថុតាងត្រូវសមត្ថកិច្ចការិយាល័យជំនាញបាននឹងកំពុងរៀបចំសំណុំរឿងបញ្ជូនទៅតុលាការដើម្បីចាត់ការតាមនីតិវិធី៕
