ភ្នំពេញ ៖ លោក រាជ សារ៉ាត់ ចាងហ្វាងការផ្សាយ នៃសារព័ត៌មាន និងគេហទំព័រ រស្មីគោកធ្លក នៅរសៀលថ្ងៃទី២៣ ខែមិថុនា ឆ្នាំ២០២០នេះ បានធ្វើការបដិសេធ ចំពោះជនខិលខូច ដែលបានយកឈ្មោះលោក ដោយប្រើលេខទូរស័ព្ទ 092 43 71 43 ក្នុងអង្គភាពសារព័ត៌មាន Post News ទាក់ទងរឿងល្បែង។
រាល់ព័ត៌មានខាងលើ លោកបានធ្វើការបដិសេធចោលទាំងស្រុង និង សូមឲ្យម្ចាស់លេខទូរស័ព្ទខាងលើនេះបញ្ឈប់សកម្មភាពជាបន្ទាន់។ លោកក៏បានសូមឲ្យក្រសួង មានសមត្ថកិច្ច និងអាជ្ញាធរពាក់ព័ន្ធ មេត្តាជ្រាប និងជួយចាត់វិធានការ ស្វែងរកជនខិលខូចនោះមកផ្តន្ទាទោសតាមច្បាប់ផងដែរ។
ឆ្លៀតក្នុងឱកាសនេះ លោក រាជ សារ៉ាត់ ចាងហ្វាងការផ្សាយ នៃសារព័ត៌មាន និងគេហទំព័រ រស្មីគោកធ្លក បានបញ្ជាក់ជាថ្មីថា លោកមិនដែលបានស្នើរសុំថវិកាពីជនណាម្នាក់ ដោយប្រើឈ្មោះអង្គភាព និងលេខទូរស័ព្ទខាងលើ ដូចដែលជនខិលខូចយកឈ្មោះលោកទៅប្រើនោះឡើយ។
ជាមួយគ្នានោះ លោក រាជ សារ៉ាត់ ក៏បានបញ្ជាក់ផងដែរថា លោកធ្លាប់ជាបុគ្គលិក អង្គភាព Post News កាលពីជាង៣ឆ្នាំមុនឯណ្ណោះ តែបច្ចុប្បន្ននេះ លោកបានកសាងបើកអង្គភាពខ្លួនឯង ឈ្មោះថា រស្មីគោកធ្លក ដែលដំណើរការដល់សព្វថ្ងៃ៕
