កំពង់ចាម៖ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម អមដំណើរដោយមន្ត្រីពាក់ព័ន្ធ និងអជ្ញាធរមូលដ្ឋាន នាព្រឹកថ្ងៃទី២៣ ខែមិថុនា ឆ្នាំ២០២០នេះ បានប្រេីប្រាស់តាមយុទ្ធសាស្ត្រឈ្នះៗ របស់សម្តេចតេជោ ហ៊ុន សែន ដេីម្បីដោះស្រាយបញ្ហាវិវាទដីធ្លីមួយកន្លែង ស្ថិតនៅក្នុងថ្មី និងភូមិតាមាង ឃុំកោះរកា ស្រុកកំពង់សៀម ដោយភាគីទាំង២បានទទួលផលប្រយោជន៍ពីដីទីទួលចំប៉ីនោះទាំងអស់គ្នា ពោលគឺភាគីចង់បានប្លង់កម្មសិទ្ធមកគ្រប់គ្រងបានស្ម័គ្រចិត្តកាត់ដី២០% សម្រាប់បម្រុងទុកជាទីទួលសុវត្ថិភាពក្នុងរដូវទឹកជំនន់ ដែលប្រជាពលរដ្ឋជាទូទៅអាចយកសត្វពាហនៈមកស្នាក់នៅបណ្តោះអាសន្ននៅទីតាំងនោះបានទាំងអស់គ្នា ។
ថ្លែងក្នុងឱកាសនោះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម បានលេីកឡើងថា បន្ទប់ពីទទួលបានប័ណ្ណកម្មសិទ្ធគ្រប់គ្រងដីធ្លីនេះហើយ សូមបងប្អូនប្រជាពលរដ្ឋ កុំយកវាទៅបញ្ចាំ ឬក៏លក់ដូរអី គឺត្រូវខិតខំធ្វើការអាស្រ័យផលលេីដីនេះ ឲ្យមានជីវភាពធូរធារទាំងអស់គ្នា និងគួរតែទុកជាកេរ្តិ៍ដំណែលសម្រាប់កូនចៅយើងនៅជំនាន់ក្រោយៗ ឲ្យបានទទួលផលប្រយោជន៍ពីដីនេះផង ព្រោះនេះជាដីដែលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្តល់ឲ្យបងប្អូនទាំងអស់គ្នា តាមរយៈគោលនយោបាយឈ្នះៗរបស់សម្តេចនោះហេីយ ។
ជាមួយគ្នានោះ ឯកឧត្ដមអភិបាលខេត្ត ក៏បានបញ្ជាក់ផងដែរថា អាជ្ញាធរដែលឈរនៅចំពោះមុខបងប្អូនទាំងអស់គ្នានេះ គឺជាអ្នកបម្រើរាស្ត្រយ៉ាងពិតប្រាកដ បេីបងប្អូនមានបញ្ហាអ្វី ឬត្រូវការអ្វីនោះ សូមប្រាប់មកអាជ្ញាធរយើង តាមរយៈភូមិ ឃុំ និងស្រុក ដេីម្បីឲ្យពួកគាត់ជួយដោះស្រាយរាល់តម្រូវការជូនពុកម៉ែបងប្អូនផង ។
មេឃុំកោះរកា លោក ផន ផូ បានឲ្យដឹងថា ពាក់ព័ន្ធដីទីទួលចំប៉ីនេះ គឺមានទំហំប្រមាណជា៦ហិកតា ដែលមានប្រជាពលរដ្ឋ២៤គ្រួសារ នៅភូមិថ្មី ភូមិតាមាង ឃុំកោះរកា ស្រុកកំពង់សៀម និងភូមិកំពង់រលីង សង្កាត់សំបួរមាស ក្រុងកំពង់ចាម បានស្នើសុំប័ណ្ណកម្មសិទ្ធគ្រប់គ្រង ហើយក៏មានប្រជាពលរដ្ឋ សុំទុកជាទីទួលសុវត្ថិភាពសម្រាប់បម្រុងទុកពេលរដូវទឹកជំនន់ផងដែរ ៕
