(ភូមិភាគ៥) ៖ឯឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក លើផែនការចុះត្រួតពិនិត្យនិងប្រជុំពង្រឹងការងារទំនាក់ទំនងការងារព្រំដែនកម្ពុជា-ថៃ ក្នុងទិសយោធភូមិភាគទី៥ ។
លោកឧត្តមសេនីយ៍ទោ ចន្ទ័ រដ្ឋា មេបញ្ជាការរងយោធភូមិភាគទី៥ ទទួលបន្ទុកការងារព្រំដែន នៅថ្ងៃទី២៦ ខែមិថុនា ឆ្នាំ២០២០ បានដឹកនាំក្រុមការងារជំនាញយោធភូមិភាគទី៥ ចុះត្រួតពិនិត្យ និងប្រជុំពង្រឹងក្រុមការងារទំនាក់ទំនងព្រំដែនកម្ពុជា-ថៃច្រក៥៦ ថ្មដា ដែលស្ថិតនៅក្នុងភូមិសង្គមថ្មី ឃុំថ្មដា ស្រុកវាលវែង ខេត្តពោធិ៍សាត់។
ការចុះត្រួតពិនិត្យប្រជុំពង្រឹងក្រុមការងារទំនាក់ទំនងកម្ពុជា-ថៃ តាមបណ្ដាច្រកទាំង១៣ ក្នុងទិសយោធភូមិភាគទី៥ ពេលនេះធ្វើឡើងក្រោយពីមានការផ្ទេរ-ប្រគល់ ក្រុមការងារទំនាក់ទំនងព្រំដែនកម្ពុជា-ថៃ ដែលពីមុនស្ថិតក្រោមការគ្រប់គ្រងរបស់អគ្គបញ្ជាការ ហើយបានធ្វើពិធីផ្ទេរ-ប្រគល់ឱ្យចំណុះយោធភូមិភាគទី៥ កងទ័ពជើងគោក កាលពីថ្ងៃទី២៣ មិថុនា ឆ្នាំ ២០២០ កន្លងមក ។
លោកឧត្តមសេនីយ៍ទោ ច័ន្ទ រដ្ឋា បានធ្វើការផ្ដាំផ្ញើនិងណែនាំដល់ក្រុមការងារទំនាក់ទំនងព្រំដែនកម្ពុជា-ថៃ ច្រក៥៦ ថ្មដា ឱ្យមានការសាមគ្គីឯកភាពផ្ទៃក្នុងឱ្យបានល្អប្រសើរ ហើយត្រូវពង្រឹងទំនាក់ទំនងសម្ព័ន្ធមេត្រីភាពជាមួយភាគីថៃ រក្សាឲ្យបាននូវស្ថិរភាព សន្តិសុខ និង សន្តិភាព ដើម្បីឱ្យមានការអភិវឌ្ឍតាមបណ្ដាច្រកព្រំដែនកម្ពុជា-ថៃ ឱ្យមានការរីកចម្រើនដូចបណ្ដាប្រទេសជិតខាងយើង។
