ភ្នំពេញ៖នៅទីស្តីការគណៈរដ្ឋមន្ត្រី នាព្រឹកថ្ងៃទី២ ខែកក្កដា ឆ្នាំ២០២០នេះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានអញ្ជើញជាវាគ្មិនក្នុងពិធី សន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់រដ្ឋបាលខេត្ដកំពង់ចាម» ដោយមានការចូលរួមពីសំណាក់ ឯកឧត្តម ខ្លូត ផន ប្រធានក្រុមប្រឹក្សាខេត្ត អភិបាលរងខេត្ត នាយក នាយករងរដ្ឋបាលសាលាខេត្ត មន្ទីរ-អង្គភាពជំនាញជុំវិញខេត្ត និងមន្រ្តីពាក់ព័ន្ធ។
ឯកឧត្តម អ៊ុន ចាន់ដាអភិបាលខេត្តកំពង់ចាម ថ្លែងអំណរគុណចំពោះអង្គភាពអ្នកនាំពាក្យរាជរដ្ឋាភិបាល ដែលបានរៀបចំសន្និសីទ សារព័ត៌មានស្ដីពី «វឌ្ឍនភាព និងសមិទ្ធផលឆ្នាំ២០១៩ និងទិសដៅការងារបន្តសម្រាប់ឆ្នាំ២០២០ របស់រដ្ឋបាលខេត្តកំពង់ចាម» ជាពិសេស សូមថ្លែងអំណរគុណចំពោះក្រសួងមហាផ្ទៃ ដែលបានអនុញ្ញាត ឱ្យរដ្ឋបាលខេត្តកំពង់ចាម ចូលរួមធ្វើសន្និសីទនាពេលនេះ។
ក្នុងនាមរដ្ឋបាលខេត្ត ក្រុមប្រឹក្សា គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋខេត្តកំពង់ចាមទាំងមូល ឯកឧត្តម ភិបាលខេត្តកំពង់ចាម បានសម្ដែងនូវការដឹងគុណយ៉ាងជ្រាលជ្រៅបំផុត ចំពោះការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាបិតាស្ថាបនិកសន្តិភាពនៃកម្ពុជាចាប់តាំងពីថ្ងៃ ៧មករា មកដល់បច្ចុប្បន្ន និងតទៅអនាគត “សូមអរគុណនយោបាយឈ្នះ-ឈ្នះ” “សូមអរគុណសន្តិភាព” តាមរយៈនេះរាជរដ្ឋាភិបាលបានដាក់ចេញនូវ កម្មវិធីនយោបាយយុទ្ធសាស្ត្រចតុកោណដំណាក់កាលទី៤ នីតិការទី៦នៃរដ្ឋសភា ខេត្តកំពង់ចាមបាននឹងកំពុងមានការអភិវឌ្ឍន៍រីកចម្រើន និងប្រែប្រួលមុខមាត់ជាបន្តបន្ទាប់ទាំងផ្នែកសន្តិសុខ សណ្តាប់ធ្នាប់សាធារណៈ សេដ្ឋកិច្ច សង្គមកិច្ច បរិស្ថាន និងសមិទ្ធផលរូបវ័ន្តជាច្រើន ជាពិសេសជីវភាពរស់នៅរ បស់ប្រជាពលរដ្ឋ កាន់តែលើកកម្ពស់ពីមួយថ្ងៃទៅមួយថ្ងៃក្រោមដំបូលនៃសុខសន្តិភាព។
គ្រប់សមិទ្ធផលដែលខេត្តសម្រេចបាន គឺជាមោទនៈភាពរបស់ខេត្តកំពង់ចាម ដែលកើតចេញពីការចូលរួមទាំងកម្លាំងកាយចិត្ត និងប្រាជ្ញាស្មារតីមុះមុតពីសំណាក់គ្រប់ភាគីពាក់ព័ន្ធ មានក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាមដែលដឹកនាំដោយឯកឧត្តម យឹម ឆៃលី ឧបនាយរដ្ឋមន្រ្តី ប្រធានក្រុមប្រឹក្សាស្តាអភិវឌ្ឍន៍វិស័យកសិកម្ម និងជនបទ ព្រះតេជគុណ គ្រប់ព្រះអង្គ មន្រ្តីរាជការ កម្លាំងប្រដាប់អាវុធគ្រប់ប្រភេទ និងប្រជាជនគ្រប់មជ្ឈដ្ឋានជាពិសេសដោយសារប្រទេសជាតិយើងមានសន្តិភាព ស្ថេរភាពនយោបាយ ដែលជាសសរស្ដម្ភដ៏រឹងមាំ សម្រាប់ការអភិវឌ្ឍន៍ និងជំនឿទុកចិត្តរបស់ប្រជាពលរដ្ឋ វិនិយោគិន អ្នកទេសចរអន្ដរជាតិ ក្រោមការដឹកនាំប្រកបដោយភាពប៉ិនប្រសប់ និងឈ្លាសវៃរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដាក់ចេញកម្មវិធីនយោបាយរបស់រាជរដ្ឋាភិបាល នីតិកាល ទី៦នៃរដ្ឋសភា យុទ្ធសាស្ត្រចតុកោណដំណាក់កាលទី៤ ផែនការយុទ្ធសាស្ត្រអភិវឌ្ឍន៍ជាតិឆ្នាំ២០១៩-២០២៣ និងនាំមកនូវកំណើនសេដ្ឋកិច្ចក្នុងរង្វង់៧% បានជះឥទ្ធិពលក្នុងការអភិវឌ្ឍន៍ទាំងនេះ។
ជាក់ស្តែងនាពេលថ្មីៗនេះ សមិទ្ធផលជាប្រវត្តិសាស្ត្រដែលប្រមុខរាជរដ្ឋាភិបាល បានផ្តល់ជូនប្រជាពលរដ្ឋខេត្តកំពង់ចាម ដែលរួមមាន៖ ស្ពានឆ្លងកាត់ទន្លេមេគង្គស្ទឹងត្រង់-ក្រូចឆ្មារ ផ្លូវលេខ៧០បេ សាលារៀន និងសមិទ្ធផលនានាទាំងផ្នែកពុទ្ធចក្រ និងអាណាចក្រក្នុងខេត្ត រួមជាមួយគោលនយោបាយ របបបេឡាជាតិសន្តិសុខសង្គម ជាដើម។
សូមបញ្ចាក់ដែរថា៖ ក្នុងសន្និសីទសារព័ត៌មាន ក៏បានបង្ហាញ អំពីសក្តានុពលសេដ្ឋកិច្ចរបស់ខេត្តកំពង់ចាមដែលពឹងផ្អែកលើវិស័យសំខាន់ៗចំនួន៣ គឺវិស័យកសិកម្ម សេវាកម្ម និងវិស័យសិប្បកម្ម ក្នុងនោះប្រជាពលរដ្ឋប្រកបមុខរបរ កសិកម្មជាចម្បងស្មើនឹង ៦៦,២%, សិប្បកម្ម 0,៧០% និងរបរសេវាកម្ម ៣៣,១%។ ក្នុងឆ្នាំ២០១៩កន្លងមកនេះទំហំសេដ្ឋកិច្ចរបស់ខេត្តកំពង់ចាមសរុបប្រមាណ ៧.៦១៧.០៨២លានរៀល (ប្រាំពីរលាន ប្រាំមួយរយដប់ប្រាំពីរពាន់ ប៉ែតសិបពីរលានរៀលគត់) គិតជាដុល្លា ១.៨៧១,៥០លានដុល្លា ស្មើនឹង៧,១%នៃសេដ្ឋកិច្ចជាតិសរុប ចំណូលសម្រាប់មនុស្សម្នាក់មានចំនួន ១.៦៧៩ដុល្លា។ កំណើនសេដ្ឋកិច្ចទទួលបានពីវិស័យកសិកម្ម ៣៨% សិប្បកម្ម ១៩% និងសេវាកម្ម ៤៣%៕
