ភ្នំពេញ ៖ នៅរសៀលថ្ងៃពុធ ១១កើត ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០១ ខែកក្កដា ឆ្នាំ២០២០ រដ្ឋបាលខណ្ឌចំការមន ដឹកនាំដោយលោក អាំង សិរីពិសិដ្ឋ អភិបាលរង នៃគណៈអភិបាលខណ្ឌចំការមន តំណាងលោក ថេង សុថុល អភិបាល នៃគណៈអភិបាលខណ្ឌចំការមន បានចុះត្រួតពិនិត្យសំណង់ផ្ទះល្វែង ស្ថិតនៅផ្ទះលេខ២៣B ផ្លូវលេខ១៧៣ ភូមិ៤ សង្កាត់ទួលទំពូងទី២ ខណ្ឌចំការមន ដោយមានពាក្យបណ្ដឹងរបស់បងប្អូនប្រជាពលរដ្ឋជិតខាង។
ក្រុមការងាររដ្ឋបាលខណ្ឌចំការមន បានត្រួតពិនិត្យឃើញថា សំណង់មានលិខិតអនុញ្ញាតសាងសង់លេខ ០០៩/២០ ដនស ចេញដោយរដ្ឋបាលខណ្ឌចំការមន, សំណង់កំពុងសាងសង់បុកគ្រឹះ, ពិតជាមានបែកប្រព័ន្ធលូបង្ហូរទឹក និងមានក្លិនមិនល្អ។
បន្ទាប់ក្រុមការងារត្រួតពិនិត្យរួចមក ក្រុមការងារបានណែនាំឲ្យម្ចាស់ការដ្ឋាន ដោះស្រាយជួលជុលប្រព័ន្ធលូ ជាមុនសិន។
ក្នុងករណីម្ចាស់ការដ្ឋានមិនអនុវត្តតាមក្រុមការងារ នឹងចាត់វិធានការរដ្ឋបាល ដោយផ្អាកការសាងសង់ជាបណ្ដោះអាសន្ន៕
