បន្ទាយមានជ័យ៖ នៅព្រឹកថ្ងៃព្រហស្បតិ៍ ១១រោច ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៦ ខែកក្កដា ឆ្នាំ២០២០នេះ
ប្រជាពលរដ្ឋក្រីក្រ ជនងាយរងគ្រោះ និងគ្រួសារគ្រិស្តបរិស័ទសរុបចំនួន ១០០គ្រួសារ រស់នៅក្នុងភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ បានទទួលអំណោយមនុស្សធម៌ពីអង្គការស្ពានពន្លឺអន្តរជាតិ ក្រោមអធិបតីភាពលោក ស្វាយ ជា អភិបាលរង នៃគណៈអភិបាលស្រុកម៉ាឡៃ និងលោក គៀង ប៊ុននី នាយកព័ស្តុភារ នៃអង្គការស្ពានពន្លឺអន្តរជាតិ ប្រចាំខេត្តបន្ទាយមានជ័យ។
ក្នុងពិធីនេះដែរ មានវត្តមានអញ្ជើញចូលរួមពីលោកស្រីសមាជិកក្រុមប្រឹក្សាឃុំទួលពង្រ លោកមេភូមិអូរអំពិល កម្លាំងប្រជាការពារភូមិ ព្រមទាំងក្រុមការងារអង្គការស្ពានពន្លឺអន្តរជាតិ រួមនឹងបងប្អូនប្រជាពលរដ្ឋសរុបប្រមាណជាង ១០០នាក់។
លោក គៀង ប៊ុននី នាយកព័ស្តុភារ នៃអង្គការស្ពានពន្លឺអន្តរជាតិ បានមានប្រសាសន៍ថា អំណោយមនុស្សធម៌ដ៏ស្តួចស្តើងនាពេលនេះ គឺជាការសម្តែងនូវសមានចិត្តមនុស្សធម៌ចូលរួមចំណែកជាមួយអាជ្ញាធរមូលដ្ឋានក្នុងកាលៈទេសៈដ៏លំបាកក្នុងស្ថានភាពនៃការរីករាលដាលជាសកលរបស់មេរោគឧត្បាតបង្កឡើងដោយវីរុសកូវីដ-១៩ (COVID-19) នាពេលបច្ចុប្បន្ននេះ។ មួយវិញទៀត អង្គការស្ពានពន្លឺអន្តរជាតិ នៅតែបន្តបេសកកម្មរបស់ខ្លួនក្នុងកិច្ចការមនុស្សធម៌ដើម្បីចូលរួមចំណែកជាមួយអាជ្ញាធរមូលដ្ឋានកាន់តែផុលផុសបន្ថែមទៀត។
អំណោយមនុស្សធម៌ដែលរៀបចំឡើងដោយអង្គការស្ពានពន្លឺអន្តរជាតិ ចែកជូនដល់ប្រជាពលរដ្ឋក្រីក្រ ជនងាយរងគ្រោះ និងគ្រួសារគ្រិស្តបរិស័ទចំនួន ១០០គ្រួសារ រស់នៅក្នុងភូមិអូរអំពិល ឃុំទួលពង្រ នាព្រឹកនេះទទួលបានអង្ករខ្សាយចំនួន ១០គីឡូក្រាម, ទឹកពិសាបរិសុទ្ធកាដុងចំណុះ ២០លីត្រ ចំនួន ១កាដុង និងមីចំនួន ១កេស ក្នុងមួយគ្រួសារ។
ក្នុងឱកាសនោះ លោក ស្វាយ ជា អភិបាលរង នៃគណៈអភិបាលស្រុកម៉ាឡៃ មានមតិសំណេះសំណាល និងសម្តែងនូវការកោតសរសើរខ្ពស់ចំពោះលោក គៀង ប៊ុននី នាយកព័ស្តុភារ នៃអង្គការស្ពានពន្លឺអន្តរជាតិ រួមនឹងក្រុមការងារដែលបានរៀបចំអំណោយមនុស្សធម៌ដ៏មានអត្ថន័យនាឱកាសនេះ។
សកម្មភាពសប្បុរសធម៌នេះ ចាត់ទុកជាការចូលរួមចំពេលជាមួយអាជ្ញាធរមូលដ្ឋានក្នុងស្ថានភាពដែលបងប្អូនប្រជាពលរដ្ឋជួបការខ្វះខាតខ្លាំងដោយរងផលប៉ះពាល់នៃជំងឺកូវីដ-១៩។
ឆ្លៀតក្នុងឱកាសនេះ លោកអភិបាលរងស្រុកម៉ាឡៃ បានក្រើនរម្លឹកចំពោះបងប្អូនប្រជាពលរដ្ឋសូមកុំភ្លេចខ្លួនបាត់បង់នូវការប្រុងប្រយ័ត្នក្នុងការការពារខ្លួនពីការចម្លងនៃរលកទីពីរជំងឺកូវីដ-១៩ ដែលកត្តានេះគឺជាហានិភ័យខ្ពស់ក្នុងការបើកផ្លូវសម្រាប់ការរាតត្បាតនៃវីរុសកូវីដ-១៩ នៅក្នុងមូលដ្ឋានរបស់យើងទាំងអស់គ្នា។
លោក ស្វាយ ជា អភិបាលរង នៃគណៈអភិបាលស្រុកម៉ាឡៃ បានសង្កាត់ធ្ងន់ថា ក្នុងកាលៈទេសៈនេះគឺជាដំណាក់កាលផុយស្រួយបំផុត ដែលយើងទាំងអស់គ្នាចាំបាច់ត្រូវតែមានការប្រុងប្រយ័ត្នជាប់ជានិច្ច និងមិនត្រូវភ្លេចទេថា វីរុសកូវីដ-១៩ នៅតែមានចរាចរ និងអាចចម្លងពីមនុស្សម្នាក់ទៅមនុស្សម្នាក់ទៀតបានដោយងាយស្រួល និងលឿនជាទីបំផុតដោយមិនដឹងខ្លួនតាមផ្លូវធ្វើដំណើរ ទីដែលមានមនុស្សជួបជុំច្រើន ក្នុងផ្សារ និងការចល័តរបស់មនុស្ស ប្រសិនបើបុគ្គលម្នាក់ៗ មិនបានប្រុងប្រយ័ត្នការពារខ្លួនឱ្យបានខ្ជាប់ខ្ជួនទៅតាមការណែនាំរបស់ក្រសួងសុខាភិបាល និងបទបញ្ជារបស់រាជរដ្ឋាភិបាលកម្ពុជា៕ដោយ៖លោកចាន់ ពុធ
