ក្រុងប៉ោយប៉ែត ៖ ដោយគិតគូរ សុខទុក្ខ និងសុខភាព ប្រជាពលរដ្ឋ នៅល្ងាច ថ្ងៃអង្គារ ១ កើត ខែស្រាពណ៍ ឆ្នាំជូតទោស័ក ពុទ្ធសករាជ ២៥៦៤ត្រូវនឹងថ្ងៃទី២១ ខែកក្កដា ឆ្នាំ២០២០ នេះ លោក គាត ហ៊ុល អភិបាល នៃគណៈ អភិបាលក្រុងប៉ោយប៉ែត អមដំណើរ លោក លោក ម៉ក់ រតនា អនុប្រធានការិយាល័យសាធារណការ ដឹកជញ្ជូន អនាម័យ បរិស្ថាន និងសណ្តាប់ធ្នាប់សាធារណៈក្រុង • លោក ភោគ លន ចៅសង្កាត់ប៉ោយប៉ែត សហការជាមួយក្រុមគ្រូពេទ្យជំនាញ ចុះបាញ់ថ្នាំ សម្លាប់មេរោគ មូស សត្វល្អិត ក្នុងភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ដើម្បី រួមចំណែក ការពារ សុខភាពបងប្អូនប្រជាពលរដ្ឋ ។
សូមជម្រាបថា សកម្មភាពដែល អាជ្ញាធរ ដឹកនាំដោយលោក គាត ហ៊ុល អភិបាល នៃគណៈអភិបាលក្រុងនាល្ងាចនេះ បានធ្វើឡើងបន្ទាប់ពី មាន បងប្អូនប្រជាពលរដ្ឋ មានជំងឺ ចម្លែកដោយ មាន អាការៈ ដូចជា ៖
១ • គ្រុនក្តៅ
២ • កន្ទួលក្រហមលើស្បែក
៣ • ឈឺសាច់ដុំ
៤ • ឈឺសន្លាក់ដៃជើង
#ប៉ុន្តែមិនមានបងប្អូនប្រជាពលរដ្ឋមួយរូបណាប្រកាច់ នោះទេ មិនដូច ការបង្ហោះ ក្នុងសង្គមហ្វេសប៊ុក របស់ បុគ្គលមួយចំនួន នោះទេ នេះបើយោងតាមការបញ្ជាក់របស់ ក្រុមវេជ្ជបណ្ឌិត កំពុងតាមដាន និង មើលថែ បងប្អូនប្រជាពលរដ្ឋ ។
សូមរម្លឹកថា នៅព្រឹកនេះដែល មន្ទីរសុខាភិបាលខេត្តបន្ទាយមានជ័យ ក្រុមឆ្លើយតបបន្ទាន់(RRT) និង កម្មវិធីផ្តល់ថ្នាំបង្ការ សហការជាមួយអាជ្ញាធរមូលដ្ឋានបន្តចុះអន្តរាគមន៍ ស្រាវជ្រាវ និង បូមឈាមអ្នកសង្ស័យដែលមានគ្រុនក្តៅ កន្ទួលក្រហមលើស្បែក មានឈឺសាច់ដុំ នឹង ឈឺសន្លាក់ដៃជើងចំនួន ៩២ នាក់ (ស្រី៥១នាក់) នៅភូមិក្បាលកោះ ភូមិប៉ោយប៉ែត និងភូមិព្រៃគប់ សង្កាត់ប៉ោយប៉ែត។ ក្នុងនោះ មានអ្នកជម្ងឺចំនួន១១ នាក់(ស្រី៤នាក់)បានអនុញ្ញាតអោយសម្រាកតាមដាន និងព្យាបាល នៅមន្ទីរពេទ្យបង្អែកប៉ោយប៉ែត។ មកដល់ម៉ោង ១១:៣០ នាទី នាថ្ងៃនេះ សុខភាពអ្នកជម្ងឺធូរស្បើយជា។
ក្រុមការងារបានបូមឈាមអ្នកសង្ស័យដើម្បីរកមើល ៖
១ • ជំងឺគ្រុនឈីក (Chikungunya)
២ • ជំងឺស្អូច រឺកញ្ជ្រិល (Measles or Rubella)
៣ • យកសំណាករកមេរោគជំងឺកូវីដ១៩ ។
សន្និដ្ឋានបឋម៖
ជារួមបញ្ហាជម្ងឺដែលកើតឡើងខាងលើអាចជា : ករណីគ្រុនក្តៅមានកន្ទួល និងឈឺសន្លាក់ គឺសង្ស័យ ជំងឺគ្រុនឈីក (Chikungunya)រឺ អាចជា ជំងឺស្អូច រឺកញ្ជ្រិល (Measles or Rubella) ។
ការអន្តរាគមន៍បន្ទាន់:
– ផ្តល់ការអប់រំសុខភាពអំពី អនាម័យបរិស្ថាន អនាម័យខ្លួនប្រាណ សុវត្ថិភាពចំណីអាហារ និង វិធីបង្ការជំងឺ ឆ្លងផ្សេងៗ
– បំផុសអោយមានការចូលរួមសម្អាតបរិស្ថាន និងបំបាត់ជំរកមូសខ្លា
– ការបាញ់ថ្នាំ សម្លាប់ជម្រកមូសខ្លានៅភូមិ គោលដៅ និងទីសាធារណៈ។
មន្ទីរសុខាភិបាលខេត្ត បន្តការខិតខំ ចុះស្រាវជ្រាវ និង អន្តរាគមន៍រាល់បញ្ហាសុខភាពដែលអាចកើតឡើងជាយថាហេតុ ក្នុងមូលដ្ឋានដោយសហការជាមួយអាជ្ញាធរមូលដ្ឋាន និង សូមអំពាវនាវ អោយប្រជាពលរដ្ឋដែលមានបញ្ហាសុខភាពមកទទួលសេវានៅមណ្ឌលសុខភាព និង មន្ទីរពេទ្យបង្អែកដែលនៅជិតផ្ទះបំផុត។ ម្យ៉ាងទៀត នៅពេលទទួលលទ្ធផលនៃការវិភាគឈាម ដោយវិទ្យាស្ថានប៉ាស្ទ័រ ឫ វិទ្យាស្ថានស្រាវជ្រាវសុខភាពសាធារណ មន្ទីរសុខាភិបាលខេត្ត និងផ្តល់ព័តមានជូនសាធារណជនជ្រាប ជាព័តមាន។
សូមបញ្ជាក់ថា ការចំណាយ ថវិការក្នុងសកម្មភាព បាញ់ថ្នាំសម្លាប់មេរោគ សម្លាប់ជម្រកមូសខ្លា នាថ្ងៃនេះ គឺបានការឧបត្ថម្ភ ទាំងស្រុងពីលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ដែលមានដូចជា ៖
១ • ព្រេងម៉ាស៊ូត
២ • ថ្លៃបាយ ទឹក និងរាល់ចំណាយផ្សេងៗ ៕ដោយ ៖ចាន់ពុធ
