ខេត្តកំពង់ចាម៖សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តកំពង់ចាម ដែលដឹកនាំដោយលោកជំទាវ ញូង ចរិយា អ៊ុន ចាន់ដា ប្រធានកិត្តិយសសាខា រួមទាំងលោកជំទាវ ស៊ី វណ្ណថា សមាជិកព្រឹទ្ធសភា លោកជំទាវស្រី គឹមឆយ សមាជិករដ្ឋសភា លោកជំទាវ ប៉ាង ដានី ប្រធានប្រតិបត្តិ លោកជំទាវ លន់ សូម៉ានី លោកជំទាវ អន ហេងលក្ខិណា សមាជិកក្រុមប្រឹក្សាខេត្ត និងសហការី នាព្រឹកថ្ងៃទី២៥ ខែកក្កដា ឆ្នាំ២០២០នេះ បាននាំយកសម្ភារៈ និងថវិកាទៅប្រគល់ជូនគ្រួសារក្រីក្រជួបការលំបាក និងចាស់ជរា ចំនួន ៦គ្រួសារ រស់នៅភូមិចំនួន២ ភូមិត្រពាំងថ្ម និងភូមិត្នោតបាក់ ឃុំត្រពាំងគរ ស្រុកជើងព្រៃ ខេត្តកំពង់ចាម។
បន្ទាប់ពីបានពាំនាំនូវប្រសាសន៍ផ្ដាំផ្ញើសាកសួរសុខទុក្ខពីសំណាក់ឯកឧត្ដម អ៊ុន ចាន់ដា អភិបាលខេត្តកំពង់ចាម ជាពិសេស លោកជំទាវ សឹង្គហកិត្តិបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច និងជាប្រធានសមាគមនារី ដើម្បី អភិវឌ្ឍកម្ពុជា។
លោកជំទាវ ប៉ាង ដានី អភិបាលរងខេត្ត មានប្រសាសន៍ថា ក្រោយពីទទួលបានសេចក្ដីរាយការណ៍ ពីអាជ្ញាធរមូលដ្ឋាន លោកជំទាវផ្ទាល់ ជាពិសេស លោកជំទាវ ញូង ចរិយា ជាភរិយា ឯកឧត្ដម អ៊ុន ចាន់ដា អភិបាលខេត្ត បានអញ្ជើញចុះមកផ្ទាល់ ដើម្បី បានសួរសុខទុក្ខ និងនាំនូវអំណោយជាទឹកចិត្តបន្តិចបន្តួច សម្រាប់បងប្អូនបានដោះទ័ល ក្នុងជីវភាព បានមួយគ្រា ។
តទៅបញ្ហាចំពោះមុខ សូមបងប្អូនខិតខំដោយខ្លួនឯង ទៅតាមលទ្ធភាពជាក់ស្ដែង ដើម្បី ផ្គត់ផ្គង់ជីវភាពគ្រួសារ ។
ហើយសូមចូលរួមថែទាំ និងធ្វើអនាម័យសុខភាព និងត្រូវប្រុងប្រយ័ត្ន ចំពោះ ជម្ងឺគ្រុនឈាម ព្រោះរដូវភ្លៀងធ្លាក់ ជាពិសេស ត្រូវចូលរួមអនុវត្តឲ្យបានខ្ជាប់ខ្ជួន ទៅតាមសារអប់រំនានា របស់ក្រសួងសុខាភិបាល ដើម្បី ជៀសផុតពីឆ្លង នៃជម្ងឺកូវីដ ១៩ ដែលបច្ចុប្បន្ន ជម្ងឺដ៏កាចសាហាវមួយនេះ កំពុងគម្រាមកំហែង ដល់ប្រជាពលរដ្ឋ ក្នុងសាកលលោក ៕
