កំពង់ចាម៖ ក្នុងពិធីប្រគល់ទងជ័យលាភី ប័ណ្ណសរសើរជូនអង្គភាពមានស្នាដៃការងារឆ្នេីម និងប្រកាសចូលកាន់មុខតំណែងមន្ត្រីគ្រប់គ្រងការិយាល័យ នៃមន្ទីរអប់រំយុវជន និងកីឡា ខេត្តកំពង់ចាម នារសៀលថ្ងៃទី២៧ ខែកក្កដា ឆ្នាំ២០២០នេះ ឯកឧត្តម កៅ សុខអាន អភិបាលរងខេត្តកំពង់ចាម បានធ្វើការផ្តាំផ្ញើដល់មន្ត្រីគ្រប់គ្រងទេីបតែងតាំងថ្មី អស់លោក លោកស្រី លោកគ្រូ អ្នកគ្រូ និងអ្នកពាក់ព័ន្ធជាមួយការងារអប់រំទាំងអស់ សូមធ្វើឲ្យបានទៅតាមការប្តេជ្ញាចិត្តរបស់ខ្លួន និងឲ្យមានភាពស្មោះត្រង់នឹងមុខវិជ្ជាជីវៈ ក្នុងការផ្តល់សេវាជូនមន្ត្រីរាជការ និងការផ្តល់សេវាជូនប្រជាពលរដ្ឋ ហើយញញឹមឲ្យបានច្រើនជាមួយប្រជាពលរដ្ឋ ព្រមទាំងមានភាពស្មោះត្រង់ជាមួយអង្គភាព អាជ្ញាធរ ដែនដី ក្រសួង រាជរដ្ឋាភិបាល ជាពិសេសត្រូវមានសាមគ្គីភាពល្អ កុំឧស្សាហ៍ចាប់តែកំហុសគេច្រើនពេក និងត្រូវចេះអប់រំគេឲ្យបានច្រើនផងដែរ ។
ក្នុងពិធីនោះដែរ ឯកឧត្តម កៅ សុខអាន បានថ្លែងការកោតសរសើរ និងវាយតម្លៃខ្ពស់ចំពោះមន្ត្រីអប់រំគ្រប់លំដាប់ថ្នាក់ សាស្ត្រាចារ្យ លោកនាយក លោកស្រីនាយិកា លោកគ្រូ អ្នកគ្រូ និងអ្នកពាក់ព័ន្ធវិស័យអប់រំទាំងអស់ ដែលបានខិតខំបំពេញភារកិច្ចរៀងៗខ្លួនប្រកបដោយឆន្ទៈ មនសិការវិជ្ជាជីវៈ រួមទាំងការទទួលខុសត្រូវ ខ្ពស់ក្នុងការកសាងធនធានមនុស្ស និងការអភិវឌ្ឍវិស័យអប់រំប្រកបដោយភាពជោគជ័យ បេីទោះបីយេីងនៅមានចំណុចអវិជ្ជមាន ដែលត្រូវប្រឈម ក៏ដោយ តែយើងត្រូវជំនះបាននូវគ្រប់ឧបសគ្គទាំងនោះឆ្ពោះទៅមុខជានិច្ចនិរន្ត ។
បេីតាមរបាយការណ៍ លោក លី ម៉េងសាន ប្រធានមន្ទីរអប់រំយុវជន និងកីឡា ខេត្តកំពង់ចាម បានឲ្យដឹងថា ចំពោះការងារប្រឡងប្រណាំងនៅឆ្នាំ២០១៩ កន្លងមកនេះ ខេត្តកំពង់ចាមទទួលបានជ័យលាភី ពាន់រង្វាន់សម្តេចអគ្គមហាសេនាបតីតេជោហ៊ុន សែន គួរជាទីមោទនៈ ១-គ្រូល្អទទួលបានជ័យលាភីលេខ ១ ទូទាំងប្រទេស (មកពីបឋមសិក្សា កួច ម៉េងលី ទួលបេង ស្រុកកំពង់សៀម ) ២-គ្រូល្អទទួលបានជ័យលាភីលេខ ២ ទូទាំងប្រទេស(មកពីបឋមសិក្សា វាលវង់ ក្រុងកំពង់ចាម ) ៣-គ្រូល្អទទួលបានជ័យលាភីលេខ ៤ ទូទាំងប្រទេស (មកពីបឋមសិក្សាវាលវង់ ក្រុងកំពង់ចាម ) ៤-គ្រូល្អ ជាប់ចំណាត់ថ្នាក់ ប័ណ្ណសរសើរ (មកពីបឋមសិក្សា ស្វាយទាប ស្រុកចំការលើ ខេត្តកំពង់ចាម ) ៥-នាយកល្អ ទទួលបានជ័យលាភីលេខ ៥ ទូទាំងប្រទេស (មកពីបឋមសិក្សា ថ្លុកជ្រៅ ស្រុកកងមាស ) ៕
