ខេត្តកែប៖ នៅព្រឹកថ្ងៃទី៤ ខែកក្កដា ឆ្នាំ២០២០ បន្ទាប់ពីមានភ្លៀងធ្លាប់យ៉ាងខ្លាំងនៅខេត្តកែប បានបណ្តាលឲ្យមានការស្ទះលូមួយចំនួន ភ្លាមៗនោះ ឯកឧត្តម សោ ពិសិដ្ឋ អភិបាល នៃគណៈអភិបាលខេត្តកែប បានដឹកនាំមន្រ្តីជំនាញមន្ទីរសាធារណការ និងដឹកជញ្ជូនខេត្ត អភិបាលស្រុកដំណាក់ចង្អើរ និងមេឃុំចុះពិនិត្យ និងស្តារប្រព័ន្ធ លូប្រឡាយ និងកាយមុខទឹកទឹកនៅតាមបណ្តាលយផ្លូវជាតិលេខ៣៣ ស្ថិតនៅឃុំពងទឹក ស្រុកដំណាក់ចង្អើរ ដើម្បីដោះស្រាយបញ្ហាប្រឈមមួយចំនួនជូនប្រជាពលរដ្ឋ ព្រមជាមួយនោះ ឯកឧត្តមអភិបាលខេត្តក៏បានណែនាំដល់មន្ទីរសាធារណៈការ និងដឹកជញ្ជូនខេត្ត ពិនិត្យ សិក្សាលទ្ធភាពដាក់លូនៅតាមតំបន់មួយចំនួនឡើងវិញ ដើម្បីបញ្ចៀសការស្ទះទឹកបន្តទៅទៀត។
នៅក្នុងឲ្យកាសនោះផងដែរ ឯកឧត្តមអភិបាល នៃគណៈអភិបាលខេត្តកែប បានអំពាវនាវដល់ប្រជាពលរដ្ឋដែលមានលំនៅដ្ឋាននៅជាប់ផ្លូវទាំងអស់មុននឹងចាក់ដីសាងសង់លំនៅដ្ឋានត្រូវដាក់លូឲ្យបានត្រឹមត្រូវ ដោយមានការប្រឹក្សាយោបល់ជាមួយមន្រ្តីជំនាញសាធារណការ និងដឹកជញ្ជូន ចៀសវាងការដាក់លូមិនត្រឹមត្រូវ ធ្វើឲ្យមានការស្ទះទឹកនៅពេលមានភ្លៀងធ្លាក់ខ្លាំងម្តងៗ និងធ្វើឲ្យជន់លិចដល់ផលដំណាំ និងអ្នកនៅក្បែរៗនោះផងដែរ។
ក្នុងឱកាសនៃការចុះពិនិត្យការកក់ស្ទះទឹកនេះ ឯកឧត្តមអភិបាលខេត្តក៏បានសម្របសម្រួលជាមួយបងប្អូនប្រជាពលរដ្ឋ ដើម្បីឲ្យមន្រ្តីជំនាញកាយដីមុខផ្ទះរបស់ប្រជាពលរដ្ឋមួយចំនួន ដើម្បីបង្ហូរទឹក និងសម្របសម្រួលដល់ម្ចាស់ទីតាំងប្រកបអាជីវកម្មមួយចំនួនឲ្យកាយលូដែលបានកាក់កន្លងមកដែលមានទំហំតូច និងដាក់លូដែលមានទំហំធំឡើងវិញ ជាលទ្ធផលប្រជាពលរដ្ឋបានឯកភាពតាមសំណើររបស់ឯកឧត្តមអភិបាលខេត្ត ដើម្បីកុំឲ្យមានការស្ទះទឹកលិចបន្តទៅទៀតពេលមានភ្លៀងធ្លាក់ម្តងៗ៕
