ខេត្តស្វាយរៀង៖នាព្រឹកថ្ងៃព្រហស្បតិ៍ ទី៦ ខែសីហា ឆ្នាំ២០២០នេះ ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង បានបន្តអញ្ជេីញជាអធិបតីក្នុងសម្ពោធអគារប៉ុស្តិ៍នគរបាលរដ្ឋបាលឃុំរាជមន្ទីរ និងចែកអំណោយដល់គ្រួសារមានជីវភាពខ្វះខាតក្នុងកំឡុងពេលកូវីដ-១៩ ចំនួន ៥០គ្រួសារ នៅឃុំរាជមន្ទីរ ស្រុកកំពង់រោទិ៍។
ពិធីនេះក៏មានការអញ្ជើញចូលរួមពីឯកឧត្តមសមាជិកក្រុមប្រឹក្សាខេត្ត ឯកឧត្តមអភិបាលរងខេត្ត លោកនាយករដ្ឋបាលសាលាខេត្ត លោកស្នងការ ស្នងការរងនគរបាលខេត្ត លោកប្រធានសភាពាណិជ្ជកម្មខេត្ត ក្រុមប្រឹក្សាស្រុក គណៈអភិបាលស្រុក លោកនាយកទីចាត់ការហិររញ្ញវត្ថុសាលាខេត្ត លោកអធិការដ្ឋាននគរបាលស្រុក ក្រុមប្រឹក្សាឃុំ លោកមេប៉ុស្តិ៍ កម្លាំងនគរបាល ព្រមទាំងបងប្អូនប្រជាពលរដ្ឋជាច្រើនរូបទៀត។
មានប្រសាសន៍ទៅកាន់ពិធីនេះ ឯកឧត្តមអភិបាលខេត្តបានបញ្ជាក់ថា អគារថ្មីដែលសម្ពោធកាត់ខ្សែបូដាក់ឲ្យប្រេីប្រាស់នាថ្ងៃនេះ គឺជាសមិទ្ធផលថ្មីមួយទៀតនៅក្នុងវិស័យសន្តិសុខមូលដ្ឋាន ដែលឯកឧត្តម និងលោកជំទាវ បានចូលរួមចំណែកជួយកសាង ដេីម្បីចូលរួមចំណែកជាមួយរាជរដ្ឋាភិបាល ក្រោមការដឹកនាំរបស់សម្តេចតេជោនាយករដ្ឋមន្ត្រី ក្នុងការពង្រឹង សន្តិសុខ សុវត្ថិភាពជូនដល់ប្រជាពលរដ្ឋ។
ឯកឧត្តមអភិបាលខេត្ត ក៏បានជំរុញដល់មេប៉ុស្តិ៍ និងមន្ត្រីប៉ុស្តិ៍ត្រូវខិតខំបម្រើប្រជាពលរដ្ឋឲ្យបានល្អ និងផ្ដល់សេវាឲ្យបានឆាប់រហស័ និងមានទំនុកចិត្តពីប្រជាពលរដ្ឋ ជាពិសេសក្នុងតួនាទីភារកិច្ចការពារសន្តិសុខសុវត្ថិភាពនៅក្នុងមូលដ្ឋានរបស់ខ្លួន។
ទន្ទឹមនេះ ឯកឧត្តមអភិបាលខេត្តបានផ្តាំផ្ញេីដល់ប្រជាពលរដ្ឋ មិនត្រូវធ្វេសប្រហែសអំពីជំងឺកូវីដ-១៩ ដែលជាបញ្ហាប្រឈម របស់សកលលោក ដែលយេីងទាំងអស់គ្នាមិនត្រូវធ្វេសប្រហែសនោះទេ ត្រូវបង្កើនការយកចិត្តទុកដាក់ខ្ពស់ និងត្រៀមទប់ស្កាត់គ្រប់ពេលវេលា ដូចជាការធ្វើអនាម័យសុខភាពឲ្យបានជាប្រចាំស្របតាមការណែនាំរបស់ក្រសួងសុខាភិបាល។
ម្យ៉ាងវិញទៀត ក្នុងរដូវវស្សានេះត្រូវមានការប្រុងប្រយ័ត្នខ្ពស់ចំពោះគ្រោះថ្នាក់ធម្មជាតិផ្សេងៗដូចជា បាតុភូតខ្យល់កន្ត្រាក់ ផ្គរ រន្ទះ ជាដេីម និងត្រូវចូលរួមគោរពច្បាប់ចរាចរណ៍ផ្លូវគោក ដើម្បីការពារអាយុជីវិតខ្លួនឯង និងក្រុមគ្រួសារ ជាពិសេសឪពុក ម្តាយត្រូវ ធ្វើការអប់រំកូនចៅ ចៀសឲ្យឆ្ងាយពីគ្រឿងញៀន និងត្រៀមលក្ខណៈក្នុងការបង្កបង្កេីនផល ព្រមទាំងខិតខំប្រកបមុខរបរបន្ថែម ដើម្បីបង្កើនជីវភាពរស់នៅប្រចាំថ្ងៃ។
អំណោយដែលផ្ដល់ជូនប្រជាពលរដ្ឋ ទាំង ៥០គ្រួសារ ក្នុងឱកាសនោះ ក្នុង ១គ្រួសារ ទទួលបាន ក្រមា ១ ទឹកស៊ីអ៊ីវ ១យួរ អំបិល ១កញ្ចប់ សាប៊ូលុច ១កញ្ចប់ ម៉ាស ១០ អង្ករ ១៥ គីឡូក្រាម និង ថវិកា ២០.០០០រៀល ។
ដោយឡែក ចំពោះក្រុមប្រឹក្សាឃុំ ស្មៀនឃុំ ជំនួយការឃុំ ៧នាក់ ក្នុងម្នាក់ៗ ទទួលបានថវិកា ៣០.០០០រៀល ថ្នាក់ដឹកនាំភូមិ និងប្រជាការពារភូមិ ២០នាក់ ក្នុងម្នាក់ៗទទួលបាន ៣០.០០០រៀល កម្លាំងបុស្តិ៍នគរបាលរដ្ឋបាលឃុំរាជមន្ទីរ ៦នាក់ ក្នុងម្នាក់ៗទទួលបាន ៣០.០០០រៀល និងឧបត្ថម្ភអង្ករសម្រាប់ប៉ុស្តិ៍នគរបាលរដ្ឋបាលឃុំរាជមន្ទីរ ចំនួន ២បាវ ស្មើនឹង ១០០គីឡូក្រាម៕
