ភ្នំពេញ៖នៅថ្ងៃទី២៦ខែសីហាឆ្នាំ២០២០កម្លាំងនាយកដ្ឋានប្រឆាំងបទល្មើសបច្ចេកវិទ្យាក្រោមការចង្អុលបង្ហាញពីឯកឧត្តមនាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិក្រោមការដឹកនាំបញ្ជាផ្ទាល់ពីឯកឧត្តមឧត្តមសេនីយ៍ឯកជាពៅប្រធាននាយកដ្ឋានបានសហការជាមួយកម្លាំងការិយាល័យប្រឆាំងបទល្មើសបច្ចេកវិទ្យានៃស្នងការដ្ឋាននគរបាលរាជធានីភ្នំពេញនិងកម្លាំងអធិការដ្ឋាននគរបាលខណ្ឌមានជ័យចុះអនុវត្តដីកាបញ្ជាឱ្យចូលខ្លួនរបស់សាលាដំបូងរាជធានីភ្នំពេញដោយបាននាំខ្លួនជនសង្ស័យឈ្មោះយ៉ូងវុទ្ធី ហៅសេងភេទប្រុសអាយុ២៥ឆ្នាំ ជនជាតិខ្មែរ នៅចំណុចផ្លូវលេខ៤៤ភូមិក្បាលទំនប់សង្កាត់បឹងទំពុនទី២ខណ្ឌមានជ័យរាជធានីភ្នំពេញ។
តាមការបញ្ជាក់ពីកម្លាំងសមត្ថកិច្ចថាជនសង្ស័យគឺជាបុគ្គលិកគ្រប់គ្រងផេករបស់ក្រុមហ៊ុនលក់គ្រឿងសម្អាងមួយពាក់ព័ន្ធនឹងករណីលួចដកប្រាក់ដោយយកលេខកូដដកប្រាក់ពេលដែលអតិថិជនកម្មង់គ្រឿងសម្អាងផ្ញើលេខចូលមកPage Messenger របស់ក្រុមហ៊ុនរួចជនសង្ស័យបានលួចយកលេខកូដនោះទៅដកប្រាក់តាមបណ្តាភ្នាក់ងារផ្ញើនិងដកប្រាក់។បច្ចុប្បន្នជនសង្ស័យត្រូវបាននាយកដ្ឋានប្រឆាំងបទល្មើសបច្ចេកវិទ្យាបញ្ជូនទៅតុលាការដើម្បីចាត់ការតាមនីតិវិធី។
ឯកឧត្តមឧត្តមសេនីយ៍ឯកប្រធាននាយកដ្ឋានសូមក្រើនរំឭកដល់បងប្អូនប្រជាពលរដ្ឋឱ្យមានការប្រុងប្រយ័ត្នខ្ពស់ក្នុងការប្រើប្រាស់ប្រព័ន្ធមីក្រូហិរញ្ញវត្ថុដើម្បីផ្ទេរប្រាក់ទៅឱ្យសាច់ញាតិមិត្តភក្ដិឬដៃគូរកស៊ីជាដើម៕
