ខេត្តពោធិ៍សាត់ ៖ បុរសម្នាក់ទាស់គ្នាក្នុងគ្រួសារពីរឿងបន្ដិចបន្តួច បែរជាគិតខ្លីលួចចងកសម្លាប់ខ្លួន ស្លាប់ចោលកូន និងប្រពន្ធ បង្កឲ្យភ្ញាក់ផ្អើលឡើង កាលពីព្រឹក ថ្ងៃទី៥ ខែតុលា ឆ្នាំ២០២០ នៅលើដើមអាកាស្យាក្បែរផ្ទះឈៀងខាងលិច ស្ថិតក្នុងភូមិតាកែវក្រោម ឃុំបឹងកន្ទួត ស្រុកក្រគរ។
មន្រ្ដីនគរបាលមូលដ្ឋាន បានឲ្យដឹងថា ជនរងគ្រោះ ឈ្មោះ នឹម ណាន អាយុ៣៨ឆ្នាំ ជនជាតិខ្មែរ ហើយគេមានប្រពន្ធ និងកូនស្រីចំនួន៤នាក់ កំពុងរស់នៅក្នុងបន្ទុកគ្រួសារ និងមានលំនៅក្នុងភូមិកើតហេតុខាងលើ ។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតមាននូវរឿងអកុសលនោះ ជនរងគ្រោះបានទាស់ពាក្យសម្ដីគ្នាជាមួយនឹងប្រពន្ធរបស់គាត់ អំពីរឿងជំពាក់លុយគេ។ រីឯការខ្ចីលុយកាក់នេះ ក៏គាត់ជាប្ដីមិនបានដឹងដែរ ហើយគេឃើញម្ចាស់បំណុលគេ មកទារព្រឹកល្ងាច ទើបធ្វើឲ្យគាត់អាក់អាន់ស្រពន់ចិត្ដនឹងប្រពន្ធយ៉ាងខ្លាំង។ ប៉ុន្ដែប្រពន្ធ និងកូន មិនបានគិតថា ប្ដីរបស់គាត់បែរជាគិតខ្លីបែបនេះទេ ស្រាប់តែមកដល់វេលាខាងលើ ក៏ប្រទះឃើញជនរងគ្រោះបានចងកសម្លាប់ខ្លួន ស្លាប់បាត់ទៅហើយ។
ក្រោយពេលកើតហេតុ សមត្ថកិច្ចជំនាញបានចុះទៅពិនិត្យ និងធ្វើកោសល្យវិច័យ រួចហើយបញ្ជាក់ថា ជនរងគ្រោះពិតជាស្លាប់ដោយសារការចងកធ្វើអត្ដឃាតពិតប្រាកដមែន។
បន្ទាប់មក សមត្ថកិច្ចបានធ្វើកំណត់ហេតុ ប្រគល់សាកសពជូនក្រុមគ្រួសារ ចាត់ចែងរៀបចំធ្វើបុណ្យតាមប្រពៃណី៕
