ស្វាយរៀង ៖ កាលពីល្ងាចថ្ងៃ៨ រោច ខែអស្សុជ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១០ ខែតុលា ឆ្នាំ២០២០នេះ អ្នកស្រី ហ៊ឹម ម៉ាលី ម្ដាយបង្កើតរបស់លោកឧត្តមសេនីយ៍ទោ ហេង ឡាលីន រួមនឹងក្រុមគ្រួសារបានអញ្ជើញពិធីសូត្រមន្តបុណ្យកឋិនទានសាមគ្គីនៅវត្ដលក្ខ័រាជា ស្ថិតនៅភូមិកំពង់ចក ឃុំកំពង់ចក ស្រុករំដួល ខេត្ដស្វាយរៀង ។
ក្នុងពិធីខាងលើនេះដែរក៏មានការអញ្ជើញចូលរួមពីបងប្អូន ពុទ្ធបរិស័ទ ជិតឆ្ងាយយ៉ាងច្រេីនកុះករ។ ហើយអ្នកស្រីក៏បាននាំយកនូវបច្ច័យ និងទេយ្យវត្ថុ ប្រគេនដល់ព្រះសង្ឃនៅក្នុងពិធីបុណ្យកឋិនទានសាមគ្គីនេះផងដែរ។
គួរបញ្ជាក់ដែរថា កឋិនទាន គឺជាបុណ្យមួយ ដែលមានតែក្នុងព្រះពុទ្ធសាសនាប៉ុណ្ណោះ និងជាទានមានមក តាមផ្លូវព្រះវិន័យ ហើយក៏ជាកាលទានដ៏ពិសេសមួយ មានកំណត់ពេលវេលាច្បាស់លាស់ ពុំមែនចេះតែធ្វើនៅពេលណា ក៏បានតាមចិត្តចង់នោះឡើយ។ គឺរយៈកាលទទួលកឋិនទានក្ដី និងរយៈកាលកឋិនទានក្ដី អាចធ្វើបានតែក្នុងសម័យតែ ១ខែគត់ ចាប់ពីថ្ងៃ ១រោច ខែអស្សុជ ដល់ថ្ងៃ១៥កើត ខែកត្តិក៕
