ខេត្ដស្វាយរៀង ៖ អ្នកស្រី ហ៊ឹម ម៉ាលី ម្ដាយបង្តើតរបស់ ឯកឧត្តម ហេង ឡាលីន នៅព្រឹកថ្ងៃអាទិត្យ ៩រោច ខែអស្សុជ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី១១ ខែតុលា ឆ្នាំ២០២០នេះ បានអញ្ជើញចូលរួមដង្ហែអង្គកឋិនទានមហាសាមគ្កី ទៅកាន់វត្ដលក្ខ័រាជា ស្ថិតនៅភូមិកំពង់ចក ឃុំកំពង់ចក ស្រុករំដួល ខេត្ដស្វាយរៀង ។
ក្នុងពិធីខាងលើនេះក៏មានការអញ្ជើញចូលរួមពីបងប្អូនសាច់ញាតិ និងបុត្រាបុត្រីរួមមាន ៖ លោក បាន ម៉េងទូច និង អ្នកស្រី ឈៀង ស្រីឡៃ ព្រមទាំងបុត្រ , ឯកឧត្តម ហេង ឡាលីន និង លោកជំទាវ សេង សូវីរដ្ឋា ព្រមទាំងបុត្រ, លោក ឈៀង ម៉ាឡា និង ភរិយា ព្រមទាំងបុត្រ , លោក ហេង ឌី និង ភរិយា ព្រមទាំងបុត្រ , អ្នកស្រី ហ៊ឹម សាមុត ព្រមទាំងបុត្រ , លោក ហ៊ឹម ឈន និង ភរិយា ព្រមទាំងបុត្រ , លោក ហ៊ឹម វុទ្ធី និង ភរិយា ព្រមទាំងបុត្រ ព្រមទាំងពុទ្ធបរិស័ទ ដែលមានសេចក្តីជ្រះថ្លាក្នុងព្រះពុទ្ធសាសនា និងចូលរួមអភិវឌ្ឍវិស័យព្រះពុទ្ធសាសនា មូលមតិគ្នាជាឯកច្ឆ័ន ដង្ហែអង្គកឋិតទាន ដើម្បីវេប្រគេនព្រះសង្ឃ ដែលគង់ចាំព្រះវស្សាអស់ត្រីមាសក្នុងពុទ្ធសីមា វត្ដលក្ខ័រាជា ផងដែរ។
ព្រះចៅអធិការវត្ដលក្ខ័រាជា មានសង្ឃដីកាថា អង្គកឋិនទាននេះ បានរៀចំឡើងកាលពីរសៀលថ្ងៃ៨រោច ខែអស្សុជ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី១០ ខែតុលា ឆ្នាំ២០២០ ដោយបានថ្វាយក្រុងពាលី និងបទនមស្សការព្រះរតនត្រ័យ ចំរើនព្រះបរិត្ត និងសម្តែងធម៌ទេសនា ស្ថិតនៅភូមិកំពង់ចក ឃុំកំពង់ចក ស្រុករំដួល ខេត្ដស្វាយរៀង លុះព្រឹកថ្ងៃទី១១ ខែតុលា ឆ្នាំ២០២០នេះ បានដង្ហែអង្គកឋិនទាន ចូលវត្តលក្ខ័រាជា ដើម្បីវេប្រគេនព្រះសង្ឃ ដែលគង់ចាំព្រះវស្សាអស់ត្រីមាសក្នុងពុទ្ធសីមាវត្តខាងលើ ដោយប្រមូលបច្ច័យបានចំនួន១៨លាន ៤សែន ៤ម៉ឺនរៀល ទុកសម្រាប់កសាងសមិទ្ធផលនានាក្នុងវត្ត។
សូមបញ្ជាក់ថា កឋិនទាន គឺជាបុណ្យមួយ ដែលមានតែក្នុងព្រះពុទ្ធសាសនាប៉ុណ្ណោះ និងជាទានមានមក តាមផ្លូវព្រះវិន័យ ហើយក៏ជាកាលទានដ៏ពិសេសមួយ មានកំណត់ពេលវេលាច្បាស់លាស់ ពុំមែនចេះតែធ្វើនៅពេលណា ក៏បានតាមចិត្តចង់នោះឡើយ។ គឺរយៈកាលទទួលកឋិនទានក្ដី និងរយៈកាលកឋិនទានក្ដី អាចធ្វើបានតែ ១ខែគត់ ចាប់ពីថ្ងៃ ១រោច ខែអស្សុជ ដល់ថ្ងៃ១៥កើត ខែកត្តិក៕
