ភ្នំពេញ ៖ នៅពេលនេះស្ថានភាពទឹកស្ទឹងព្រែកត្នោត កាន់តែបន្តជន់ឡើងជាបន្តបន្ទាប់ពីមួយថ្ងៃទៅមួយថ្ងៃ ហើយបានជន់លិចភូមិឋានប្រជាពលរដ្ឋជាច្រើនគ្រួសារ ដែលរស់នៅតាមសណ្ដរស្ទឹងមួយនេះ។ គិតត្រឹមរសៀលថ្ងៃទី១៣ ខែតុលា ឆ្នាំ២០២០នេះ ប្រជាពលរដ្ឋប្រមាណជា៧៧០គ្រួសារ បានរងផលប៉ះពាលក្នុងខណ្ឌដង្កោ។
នៅរសៀលដដែលនេះដែរ ឯកឧត្តម ឃួង ស្រេង អភិបាលរាជធានីភ្នំពេញ បានដឹកនាំមន្ដ្រីជំនាញពាក់ព័ន្ធ និងអាជ្ញាធរមូលដ្ឋាន ចុះពិនិត្យស្ថានភាព តាមភូមិឋានរបស់ប្រជាពលរដ្ឋ ដែលត្រូវជំនន់ស្ទឹងព្រែកត្នោតបង្កការលិចលង់ ដូចជានៅសង្កាត់ទៀន ក្នុងខណ្ឌដង្កោ ដែលត្រូវទឹកហូរចូលផ្ទះជាបន្តបន្ទាប់។
បើតាមអាជ្ញាធរខណ្ឌដង្កោបានបង្ហាញថា រហូតមកដល់ពេលនេះ មានសង្កាត់ចំនួន៧ ក្នុងចំណោមសង្កាត់ទាំង១២របស់ខណ្ឌដង្កោ ដែលត្រូវបានលិចលង់ដោយទឹកជំនន់ ក្នុងនោះមានប្រជាពលរដ្ឋប្រមាណ៧៧០គ្រួសារ ដែលរងផលប៉ះពាល់។
ជាវិធានការណ៍ ចំពោះមុខដើម្បីទប់ស្កាត់ស្ថានភាពជន់លិចនេះ ឯកឧត្តម ឃួង ស្រេង បានបញ្ជាឲ្យចាក់ដីទប់តាមសណ្ដរស្ទឹងព្រែកត្នោតជាបណ្ដោះអាសន្នសិន។ ព្រមទាំងបានអំពាវនាវដល់ប្រជាពលរដ្ឋដែលរស់នៅតាមសណ្ដរស្ទឹងព្រែកត្នោត ក្នុងមូលដ្ឋានខណ្ឌដង្កោ ត្រូវបង្កើនការប្រុងប្រយ័ត្នខ្ពស់ ខណៈទឹកស្ទឹងព្រែកត្នោត កាន់តែហក់ឡើងខ្ពស់ជាបន្តបន្ទាប់។ យ៉ាងណាកម្លាំងសមត្ថកិច្ច និងអាជ្ញាធរ បានត្រៀមលក្ខណៈ និងចេញជួយសង្គ្រោះប្រជាពលរដ្ឋគ្រប់ពេលវេលា។
ក្នុងពេលចុះពិនិត្យស្ថានភាពនេះដែរ ឯកឧត្តមអភិបាលរាជធានីភ្នំពេញ ក៏បានណែនាំឲ្យអភិបាលខណ្ឌដង្កោចុះចលនាប្រជាជនតាមភូមិ ចូលរួមលើកដី ធ្វើជាទំនប់ទប់ទឹក នៅតាមសណ្ដរស្ទឹងព្រែកត្នោតនេះ ពិសេសអ្នកមានដីតាមដងស្ទឹង ចូលរួមចែករំលែកជួយជាគ្រឿងចក្រ កាយដី ដើម្បីលើកជាទំនប់ ការពារទឹកហូរចូលភូមិឋានផ្សេងៗទៀត។
គួរបញ្ជាក់ផងដែរថា ពាក់ព័ន្ធស្ថានភាពទឹកស្ទឹងត្រែត្នោតនេះ ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម រួមជាមួយក្រុមការងារបច្ចេកទេសបាន និងកំពុងចុះពិនិត្យនិងបញ្ជាការងារអន្តារាគមន៍ផ្ទាល់នៅលើបណ្តោយខ្នងទំនប់សណ្តរស្ទឹងព្រែកត្នោត ដែលពេលនេះកំពុងប្រឈមដោយជំនន់ទឹកស្ទឹងព្រែកត្នោត ក្នុងភូមិសាស្រ្តភាគខាងលិចរាជធានីភ្នំពេញ និងខេត្តកណ្តាល។ ស្ថានភាពទឹកនៅទ្វារ ទំនប់អាងទឹក៧មករា ថ្ងៃនេះទឹកមានកម្ពស់៨,៨០ម៉ែត្រ ធៀបនឹងថ្ងៃម្សិលមិញ មានការកើនឡើង០,៤៥ម៉ែត្របន្ថែម លើសកម្ពស់ឲ្យមានការប្រុងប្រយ័ត្ន ៧ម៉ែត្រ ធ្វើឲ្យកម្ពស់ទឹកក្នុងស្ទឹងឡើងជិតស្មើនឹងខ្នងទំនប់នៅតាមទីទំនាបមួយចំនួន៕
