ខេត្ដកំពត ៖ រយៈពេល២ថ្ងៃមកនេះថ្ងៃគឺទី១៩ និង២០ ខែតុលា ឆ្នាំ២០២០ ក្រុមការងារចម្រុះរបស់រដ្ឋបាលខេត្តកំពតបានចុះផ្ទៀងផ្ទាត់ចុចព្រំដីរបស់ក្រុមហ៊ុន វើរប្រីស្តារ អីនធើវើសម៉ែន របស់លោកឧកញ៉ា សូ ងួន ដែលមានវិវាទជាមួយប្រជាពលរដ្ឋ២២៦គ្រួសារ លើផ្ទៃដី១០៥០ ហិចតា នៅតំបន់ភ្នំថ្លាន់១០០ ក្នុងភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត បានឈានដល់ចំណុចឯកភាពគ្នាដែលគ្រប់ភាគីទទួលយកទៅតាមនិយាមការ ដែលមានដើម្បីបញ្ចប់វិវាទជាយូរមកហើយនោះ។
ក្រុមការងារចម្រុះបានសម្រេចលទ្ធផលនៃការចុះវាសវែង ពោលគឺចុចព្រំដីទៅតាមនិយាមកា ដែលបានចេញប័ណ្ណដោយក្រសួងកសិកម្មរុក្ខាប្រម៉ាញ់ និងនេសាទ បានចំនួន១៨ចំណុច ប័ណ្ណព្រំដីរវាងក្រុមហ៊ុន និងប្រជាពលរដ្ឋ២២៦គ្រួសារ។ ហើយរាល់ចំណុចនីមួយៗដែលជំនាញបានចុចព្រំដីទៅតាមនិយាមការតាមប័ណ្ណ គឺ ភាគីតំណាងឱ្យមន្ទីររៀបចំដែនដីនគររូបនីយកម្មសំណង និងភូមិបាល ដោយលោក អ៊ុក ចាន់ ភាគីតំណាងឱ្យមន្ទីរកសិកម្ម រុក្ខាប្រម៉ាញ់ និងនេសាទ ដោយ លោក អ៊ុត លី ភាគីតំណាងឱ្យក្រុមហ៊ុន វើលប្រីស្តារ អិនធើវើសម៉ែន ដោយ លោក ឡាយ តាំងលី ភាគីលោកហង្ស ស៊ីណាង តំណាងឱ្យប្រជាពលរដ្ឋ ២២៦គ្រួសារ បានឯកភាពគ្នាទទួលយកចំណុច និយាមការទាំង១៨ចំណុច ដែលក្រុមការងារបានផ្ទៀងផ្ទាត់រួច និងដោយមានការឯកភាពពីលោក អ៊ីម ប៊ុណ្ណា នាយកទីចាត់ការអន្តរវិស័យសាលាខេត្តកំពត តំណាងឱ្យឯកឧត្តម ប៉ិល កុសល អភិបាលរងខេត្ត និងជាប្រធានក្រុមការងារខេត្ត។
ជាការសង្កេតឃើញផងដែរថា ដីតំបន់ដែលមានការប្រទាញប្រទង់គ្នាខ្លាំងនាពេលកន្លងមកនោះ ក្រោយពីគណៈកម្មការចម្រុះចុចព្រំដីតាមនិយាមការ រួចមកភាគីក្រុមហ៊ុនបានយកគ្រឿងចក្រកាយប្រឡាយកំណត់ព្រំឱ្យបានច្បាស់ផងដែរ ដើម្បីកុំឱ្យមានការភាន់ច្រឡំ។ ហើយរាល់ការចុះចុចព្រំដីតាមនិយាមការនោះគឺពុំមានបាតុភាព ឫក៏ប៉ះទង្គិចគ្នាអ្វីកើតឡើងរវាងក្រុមហ៊ុន និងបងប្អូនប្រជាពលរដ្ឋ២២៦គ្រួសារនោះឡើយ។ ក្រោយពីបានកំណត់ព្រំដីច្បាស់លាស់ហើយ បើភាគីណារំលោភទន្ទ្រានមកលើដីភាគីខាងណានោះ អាជ្ញាធរនឹងអនុវត្តវិធានការតាមផ្លូវច្បាប់។
បើតាមលោកឧកញ៉ា សូ ងួន បានបញ្ជាក់ប្រាប់អង្គភាពសារព័ត៌មានយើងថា ក្រុមហ៊ុនបានជួលដីសម្បទានសេដ្ឋកិច្ចពីក្រសួងកសិកម្មរយៈពេល៥០ឆ្នាំ ដីមានប្លង់រឹងទំហំ ៦៣០០ ហិចតា នៅភូមិខាងលើនេះ ដើម្បីដាំចេកលឿងនាំចេញទៅកាន់ទីផ្សារប្រទេសចិន ដែលមានការគាំទ្រយ៉ាងពេញទំហឹងពីសំណាក់សម្តេចតេជោ នាយករដ្ឋមន្ត្រីផងដែរ ។
លោកឧកញ៉ាបញ្ជាក់ទៀតថា ក្រុមហ៊ុន ត្រូវចំណាយប្រាក់រាប់រយលានដុល្លារ ដើម្បីរៀបចំសាងសង់រោងចក្រ ជីកស្រះ និងត្រូវការកម្មករប្រមាណជិត១ម៉ឺននាក់ ដោយក្រុមហ៊ុនមានរៀបចំមានផ្ទះស្នាក់នៅ ដែលក្រុមហ៊ុនធ្វើឱ្យ និងផ្តល់ប្រាក់ខែចាប់ពី២០០ ទៅ៣០០ និងដល់រាប់ពាន់ដុល្លារក្នុង១ខែៗទៀតផងដែរ។
ជាមួយគ្នានេះ បងប្អូនប្រជាពលរដ្ឋ២២៦គ្រួសារ មានការត្រេកអរយ៉ាងខ្លាំង រហូតហូរទឹកភ្នែកដោយបានកោតសរសើរចំពោះដំណោះស្រាយដ៏ឈ្លាសវៃស្របតាម គោលនយោបាយឈ្នះឈ្នះរបស់ សម្ដេចតេជោ ហ៊ុន សែន គឺបញ្ចប់ជំលោះដោយមិនឲ្យភាគីណាមួយបាត់បង់ផលប្រយោជន៍ឡើយ៕
