ភ្នំពេញ ៖ ជាការធ្វេសប្រហែសរបស់នគរបាលប៉ុស្ដិ៍ស្ទឹងមានជ័យទី២ នៅយប់ថ្ងៃទី៥ ឈានចូលថ្ងៃទី៦ ខែវិច្ឆិកា ឆ្នាំ២០២០នេះ ជនសង្ស័យ៤នាក់ ពាក់ព័ន្ធករណីគ្រឿងញៀន ជិត១គីឡូក្រាម ដែលកម្លាំងនគរបាលជំនាញ នៃអធិការដ្ឋានខណ្ឌមានជ័យ សហការជាមួយកម្លាំងប៉ុស្ដិ៍ស្ទឹងមានជ័យទី២ ឃាត់បានកាលពីថ្ងៃទី៤ ខែវិច្ឆិកា កន្លងទៅនេះ ត្រូវបានលួចគាស់បន្ទប់ឃុំឃាំងចេញបាត់ដោយសុវត្តិភាពហេីយ។
នេះជាការធ្វេសប្រហែសយ៉ាងធ្ងន់ធ្ងរ របស់កម្លាំងនគរបាលប៉ុស្តិ៍ស្ទឹងមានជ័យទី២ ដែលធ្វើឲ្យជនសង្ស័យជាប់ពាក់ព័ន្ធករណីគ្រឿងញៀន រហូតដល់ជិត១គីឡូក្រាម ហែកគុករត់គេចខ្លួនបានយ៉ាងស្រួលបែបនេះ។
គួរបញ្ជាក់ថា កាលពីប៉ុន្មានខែកន្លងទៅនេះ នៅប៉ុស្តិ៍នគរបាលស្ទឹងមានជ័យទី២ ក៏ធ្លាប់មានករណីជនសង្ស័យចងកសម្លាប់ខ្លួនក្នុងបន្ទប់ឃុំឃាំងម្ដងរួចមកហេីយដែរ។
នេះជាការបញ្ជាក់អោយឃើញថា កម្លាំងនគរបាលប៉ុស្តិ៍ស្ទឹងមានជ័យទី២ ដែលមានលោក ណេង សាមឿន ជានាយប៉ុស្ដិ៍ មានភាពកំសោយនៃការគ្រប់គ្រង និងការអនុវត្តការងារ៕
