ខេត្តឧត្តរមានជ័យ៖ថ្ងៃច័ន្ទ ទី៩ ខែវិច្ឆិកា ឆ្នាំ២០២០ វេលាម៉ោង ១៥៖០០នាទី ដោយមានការចង្អុល បង្ហាញពីលោកឧត្តមសេនីយ៍ ហួត សុធី ស្នងការនគរបាលខេត្ត និងមានការសម្របសម្រួលនីតិវិធីដោយ ឯកឧត្តម តូច សុភក្ដី ព្រះរាជអាជ្ញាអមសាលាដំបូងខេត្ត ។
លោកវរសេនីយ៍ឯក ហម ភិរម្យ អធិការនគរបាលក្រុង បានដឹកនាំកម្លាំងជំនាញ និងកម្លាំងប៉ុស្តិ៍នគរបាលរដ្ឋបាលអូរស្មាច់ ចុះបង្ក្រាប ករណីចែកចាយ ប្រើប្រាស់ នូវសារធាតុញៀនដោយខុសច្បាប់ នៅចំណុចភូមិអូរពក សង្កាត់កូនក្រៀល ក្រុងសំរោង ខេត្តឧត្តរមានជ័យ ។
ក្នុងកិច្ចប្រតិបត្តិការនេះ បានធ្វើការឃាត់ខ្លួនជនសង្ស័យបានចំនួន ០២នាក់ មានឈ្មោះដូចខាងក្រោម:
១.ឈ្មោះ ពិន នឿន ភេទប្រុស អាយុ ៥៣ឆ្នាំ ជនជាតិខ្មែរ រស់នៅបន្ទប់ជួល ផ្លូវលេខ១១ ស្ថិតក្នុង ភូមិចំការចេក សង្កាត់អូរស្មាច់ ក្រុង សំរោង ខេត្តឧត្តរមានជ័យ មុខរបរ មិនពិតប្រាកដ ។
២.ឈ្មោះ ជា សុខងួន ភេទប្រុស អាយុ ២២ឆ្នាំ ជនជាតិខ្មែរ រស់នៅភូមិអូរពក សង្កាត់កូនក្រៀល ក្រុង សំរោង ខេត្តឧត្តរមានជ័យ មុខរបរ មិនពិតប្រាកដ ។
វត្ថុតាងដកហូតបាន៖ថ្នាំញៀនប្រភេទមេតំហ្វេតាមីនយ៉ាម៉ា(WY) ព៌ណផ្កាឈូកចំនួន ០១គ្រាប់ និងមេតំហ្វេតាមីនម៉ាទឹកកក (Ice ក្រាម ពណ៌ស) ចំនួន ១កញ្ចប់ធំ ៧កញ្ចប់តូច និងសំភារៈវេចខ្ចប់បំរើអោយការលក់ ជក់ មួយចំនួន ។
បច្ចុប្បន្ន ជនសង្ស័យ រួម និងវត្ថុតាងខាងលើត្រូវបាននាំមកកាន់អធិការដ្ឋាននគរបាលក្រុង ដើម្បីសាកសួរ និងក៏សាងសំណុំរឿងបញ្ជូនទៅស្នងការដ្ឋាននគរបាលខេត្ត ដើម្បីអនុវត្តតាមនីតិវិធីបន្ត ។
